Nelikten barlyq zeınetkerge bazalyq zeınetaqy tólenbeıdi
ASTANA. KAZINFORM — Elde zeınetkerlerdiń keıbir sanatynyń bazalyq tólem alý quqyǵyna qatysty daý Konstıtýtsııalyq sotta qaraldy, alaıda qoldanystaǵy tártipti ózgertý týraly sheshim qabyldanǵan joq
Konstıtýtsııalyq Sotqa azamattardyń memlekettik bazalyq zeınetaqy tólemin alýǵa quqyǵy bar adamdardyń sanattaryn belgileıtin Áleýmettik kodekstiń 205-baby 1) jáne 2) tarmaqshalarynyń Konstıtýtsııaǵa sáıkestigin qaraý týraly ótinishteri kelip tústi.
Ótinish berýshiler 2016 jylǵy 1 qańtardan keıin taǵaıyndalǵan eńbek sińirgen jyldary úshin zeınetaqy tólemderin alady jáne daýlanyp otyrǵan normaǵa sáıkes memlekettik bazalyq zeınetaqy tólemin alýǵa quqyǵy joq.
— Ótinish berýshilerdiń pikirinshe, zeınetkerlerdiń bir bóligin bazalyq zeınetaqy alatyndar qatarynan shyǵarý áleýmettik memlekettiń negizgi qaǵıdattaryna qaıshy keledi. Zeınetkerlerdiń jekelegen sanatyn memlekettik bazalyq zeınetaqy tóleminen aıyrý olardyń konstıtýtsııalyq quqyqtaryn buzady.
Konstıtýtsııalyq Sot Konstıtýtsııanyń 28-baby 1-tarmaǵyna sáıkes Qazaqstan Respýblıkasynyń azamattaryna eń tómengi jalaqy men zeınetaqy mólsheri, jasyna baılanysty, aýrýyna, múgedektigine, asyraýshysynan aıyrylýyna jáne ózge de zańdy negizder boıynsha áleýmettik qamsyzdandyrý kepildik beriletinin atap ótti, — delingen habarlamada
Osylaısha, Konstıtýtsııa elimizdegi ekonomıkalyq jaǵdaıǵa, adamnyń ómir súrý uzaqtyǵynyń serpinine, halyqtyń densaýlyq jaǵdaıyna jáne aqylǵa qonymdy ári negizdi sıpattaǵy ózge de ólshemsharttarǵa baılanysty zeınetaqy tólemderiniń eń tómengi mólsherin qamtamasyz etý shartymen, olardyń mólsherin aıqyndaýdy zańnamalyq retteý múmkindigin joqqa shyǵarmaıdy.
Konstıtýtsııalyq Sot ótinish berýshilerge buǵan deıin de atalǵan máseleniń Konstıtýtsııaǵa sáıkestigin tekserip, 2023 jylǵy 8 sáýirdegi № 8 normatıvtik qaýlyny qabyldaǵanyn, onda quqyqtyq ustanymdar men tekserý nátıjeleri boıynsha sheshimniń egjeı-tegjeıli baıandalǵanyn eske saldy. Atalǵan normatıvtik qaýly óziniń zańdy kúshin saqtaıdy.
Ótinishterdi konstıtýtsııalyq is júrgizýge qabyldaýdan bas tartyldy.
Aıta ketelik 2026 jyldan bastap Qazaqstanda keıbir áleýmettik tólemderdiń mólsheri ulǵaıatyny týraly jazǵan edik.