Nelikten 41 jastaǵylar utyp tur: BJZQ jańa ádistemeni túsindirdi
ASTANA. KAZINFORM — Biryńǵaı jınaqtaýshy zeınetaqy qory eń tómengi jetkiliktilik shegin esepteýdiń jańa ádistemesi ártúrli jastaǵy salymshylarǵa qalaı áser etkenin jáne nege zeınet jasyna jaqyndaǵan qazaqstandyqtar úshin talaptardyń eń joǵary deńgeıi belgilengenin túsindirdi.
Eń tómengi jetkiliktilik shegin esepteýdiń jańa ádistemesi engizilgennen keıin belgilengen shekten joǵary zeınetaqy jınaqtary bar salymshylardyń eń kóp bóligi 41 jastaǵy azamattar ekeni anyqtaldy. Nelikten dál osy jas toby eń qolaıly jaǵdaıda bolǵanyn BJZQ túsindirip berdi.
Qordyń málimetinshe, 41 jasqa qaraı kóptegen azamat jınaqtaýshy zeınetaqy júıesine shamamen 20 jyl qatysyp úlgeredi. Nátıjesinde edáýir kólemdegi zeınetaqy jınaǵy qalyptasady. Sonymen qatar dál osy jasta kóptegen adamnyń tabysy men mansaptyq ósýi eń joǵary deńgeıge jetip, mindetti zeınetaqy jarnalarynyń kólemi artady. Buǵan qosa, júıege qatysqan jyldar ishinde jınalǵan ınvestıtsııalyq tabys ta zeınetaqy jınaqtarynyń mańyzdy bóligine aınalady.
— Ádette bul jastaǵy adamdar zeınetaqy jınaqtaryn ınvestıtsııalaý múmkindikteri týraly kóbirek habardar. Kópshiligi qarjylyq bolashaǵyn baıyppen josparlaı bastaıdy. Bul olardy zeınet jasyna deıin qarajatty belsendi túrde jınaqtaýǵa yntalandyrady, — dep atap ótti qordan agenttiktiń saýalyna oraı.
Atalǵan faktorlardyń jıyntyǵy 41 jastaǵy azamattardyń eń tómengi jetkiliktilik sheginen joǵary jınaqtary bar salymshylardyń eń kóp tobyn quraýyna múmkindik beredi. Sonymen qatar eń joǵary eń tómengi jetkiliktilik shegi 62 jastaǵy azamattar úshin belgilengen. BJZQ muny olardyń zeınet jasyna jaqyndaýymen túsindirdi.
— Eger salymshy zeınetaqy jınaqtarynyń bir bóligin alýdy josparlasa, onda onyń shotynda bolashaqta jetkilikti mólsherde turaqty zeınetaqy tólemderin qamtamasyz etýge jetetin qarajat qalýy tıis. 62 jasta qarajatty qaıta jınaqtap, alynǵan somany tolyqtyrýǵa múmkindik beretin ýaqyt is júzinde qalmaıdy, — dep túsindiredi qordan.
BJZQ esepteýinshe, eger 62 jastaǵy azamattyń jınaǵy eń tómengi jetkiliktilik shegi deńgeıinde bolsa, onda zeınetke shyqqannan keıin qordan alatyn aı saıynǵy tólem mólsheri shamamen 127 myń teńgeni quraıdy. Bul 2026 jylǵy halyqtyń medıandyq tabysynyń shamamen 40 paıyzyna teń.
Sondaı-aq BJZQ málimetinshe, jańa ádisteme boıynsha eń tómengi jetkiliktilik sheginen asatyn zeınetaqy jınaqtaryn paıdalaný múmkindigi bar 30 jasqa tolmaǵan azamattardyń sany shamamen 1,5 myń adamdy quraıdy.
— Ártúrli jas toptaryndaǵy salymshylar sanynyń ózgerýi zeınetaqy jarnalarynyń túsý qarqynyna, ınvestıtsııalyq tabystyń kólemine jáne basqa da faktorlarǵa baılanysty bolady, — delingen jaýapta.
Qor eń tómengi jetkiliktilik shegi jyl saıyn qaıta qaralatynyn eske salady. Áleýmettik kodekske sáıkes, eń tómengi jetkiliktilik shegin aıqyndaý ádistemesin Eńbek jáne halyqty áleýmettik qorǵaý mınıstrligi ázirleıdi.
— Úkimet eń tómengi jetkiliktilik shegin aıqyndaý ádistemesin bekitedi. BJZQ respýblıkalyq bıýdjet týraly kelesi qarjy jylyna arnalǵan zań resmı jarııalanǵannan keıin bes jumys kúninen keshiktirmeı, kelesi jylǵa eseptelgen jáne qoldanylatyn eń tómengi jetkiliktilik shegin mólsherlerin buqaralyq aqparat quraldarynda, qazaq jáne orys tilderindegi keminde eki baspa basylymynda, sondaı-aq óziniń ınternet-resýrsynda jarııalaýǵa mindetti, — dep naqtylaıdy qor.
Eger Úkimet qoldanystaǵy ádistemege ózgerister engizse nemese onyń jańa redaktsııasyn bekitse, onda eń tómengi jetkiliktilik sheginiń mólsheri qaıta eseptelip, belgilengen tártippen jarııalanady.
Buǵan deıin eń tómengi jetkiliktilik shegin esepteýdiń jańa ádistemesine sáıkes, belgilengen shekten joǵary zeınetaqy jınaqtary bar azamattardyń sany 30 myńnan sál asatynyn jazǵan edik.
