Nelson Mandelanyń jesiri jarynan qalǵan muradan bas tartty
ASTANA. QazAqparat - Ońtústik Afrıka Respýblıkasynyń alǵashqy qara násildi Prezıdenti Nelson Mandelanyń jesiri balalary men nemereleriniń paıdasyna bola bólingen muradan bas tartty, dep habarlady sheteldik BAQ.
1998 jyly N.Mandelaǵa turmysqa shyqqan Grasa Mashelge muraǵa qalǵan baılyqtyń teń jartysy, naqty aıtqanda 46 mln. rand (4,2 mln. dollar) tıesili bolatyn. Ósıethat aǵymdaǵy jyldyń aqpan aıynda tanystyrylyp, Mashel úsh aıdyń ishinde óz sheshimin jarııa etýi tıis edi.
Mozambık prezıdenti Samara Masheldiń jesiri, N.Mandelanyń úshinshi áıeli Grasanyń Mozambıkte tórt úıi, kóligi jáne qundy dúnıeleri bar. Al ótken jyly jeltoqsanda jaryq dúnıemen qosh aıtysqan N.Mandela sońǵy sátterin ótkizgen Iohannesbýrg túbindegi qalashyqtaǵy úıi otbasylyq qorǵa ósıet etilgen. Biraq, G.Mashel atalǵan úıden qalaǵan óner týyndysyn alýyna bolady.
Aıta keterligi, N.Mandela óz baılyǵyn barlyq týystarymen bóliskenimen 38 jyl nekede bolǵan ekinshi áıeli ári jaqtasy Vınnıge mura retinde eshteńe qaldyrmady. Biraq olardyń ortaq qyzdary Zenanı men Zınzı 3 mln. randtan (270 myń dollar), al olardyń jeti balasy men nemereleri Zozýkýǵa 100 myń randtan (shamen 9 myń dollar) mura qaldy.
N.Mandela Mashel otbasyn da nazardan tys qaldyrmady. Mozambık prezıdentimen nekede týǵan Grasanyń balalary Djosına men Melangan 3 mln. randtan (270 myń dollar) alatyn bolady.
