Nekege májbúrleý, stalkıng: áıelderge zorlyq-zombylyq kórsetýge qarsy aqparattyq naýqan bastaldy
ASTANA. KAZINFORM – Qazaqstanda áıelderge zorlyq-zombylyq kórsetýge qarsy respýblıkalyq aqparattyq naýqan bastaldy. Іs-shara nekege májbúrleý, stalkıng jáne áıelderge qatysty ózge de zorlyq-zombylyqqa tózbeý qaǵıdatyn qalyptastyrýǵa jáne azamattardyń quqyqtyq saýattylyǵyn arttyrýǵa baǵyttaldy.
Naýqan naýryz aıynyń 10-yna deıin jalǵasady. Naýqannyń maqsaty – árbir áıel men qyz bala úshin qaýipsiz orta qalyptastyrý, zorlyq-zombylyqqa jol joq ekenin jáne bundaı áreket mindetti túrde jaýapkershilikke ákeletinin kópshilikke nasıhattaý. Atalmysh naýqan aıasynda mektepterde, kolledjderde, joǵary oqý oryndarynda jáne eńbek ujymdarynda kezdesýler ótedi.
Sonymen qatar zańger, polıtsııa qyzmetkerleri men psıhologtardyń qatysýymen dárister, jastarǵa arnalǵan jeke shekara jáne qaýipsiz orta týraly trenıngter, ata-analarmen balalardy qysym men manıpýlıatsııadan qalaı qorǵaý qajettigi týraly kezdesýler uıymdastyrylady.
Mádenıet jáne aqparat mınıstrligi málimetinshe, teledıdar men ınternet keńistiginde áleýmettik rolıkter, podkastar jáne máseleni tereń biletin sarapshylardyń qatysýymen suhbattar jarııalanady. Naýqanǵa blogerler men qoǵamdyq pikir kóshbasshylary da qatysady.
Naýqan aıasynda «QURMET» chellendji jarııalanady. Qatysýshylar áleýmettik jelilerde foto, beıne jáne qysqa mátinder jarııalap, qurmet pen jeke shekara uǵymy týraly óz pikirin bólise alady.
– Eger siz nemese jaqyndaryńyz zorlyq-zombylyqqa, qýdalaýǵa nemese nekege májbúrleýge tap bolsa, 102 – polıtsııa, 111 – Ulttyq senim telefony, óńirlerdegi Otbasyn qoldaý ortalyqtary men daǵdarys ortalyqtaryna habarlasa alady. Mádenıet jáne aqparat mınıstrligi ár azamatty bul is-sharaǵa belsene qatysýǵa shaqyrady. Kezdesýlerge kelip, balalarmen jeke shekara týraly sóılesýge, zorlyq-zombylyq kórinisterine beıjaı qaramaýǵa jáne áleýmettik jelilerdegi bastamany qoldaýǵa úndeıdi, - delingen habarlamada.
Aıta keteıik, 2025 jylǵy qyrkúıekten bastap Qazaqstanda nekege májbúrleý qylmystyq quqyqbuzýshylyq retinde zańmen bekitildi. Qylmystyq kodekske engizilgen 125-1-bap qoǵamda kópten beri talqylanyp kele jatqan qyz alyp qashý máselesine quqyqtyq núkte qoıdy. Endi «salt» nemese «dástúr» degen jeleýmen jasalǵan májbúrleý áreketteri úshin qylmystyq jaýapkershilik qarastyrylǵan.