Nekege májbúrleý boıynsha 19 is sotqa jetti – ІІM
ASTANA. KAZINFORM – Qazaqstanda stalkıng boıynsha 83, al nekege májbúrleý boıynsha 19 qylmystyq is sotqa joldandy. Bul týraly Májiliste ótken dóńgelek ústelde Іshki ister mınıstrligi Tergeý departamenti bastyǵynyń orynbasary, polıtsııa polkovnıgi Amangeldi Dosjanov málim etti.
Onyń aıtýynsha, stalkıng pen nekege májbúrleýge qatysty qylmystyq jaýapkershilikti kózdeıtin normalar kúshine engennen keıin quqyq qorǵaý organdary jańa baptar boıynsha quqyq qoldaný tájirıbesin qalyptastyryp keledi.
– Qazirgi tańda stalkıng qylmysy boıynsha 83 qylmystyq is sotqa joldandy. Al nekege májbúrleý boıynsha 19 is sotqa jiberildi. Biz árbir fakti boıynsha der kezinde qylmystyq is qozǵap, onyń barlyq mán-jaıyn muqııat tekseremiz, – dedi Amangeldi Dosjanov.
Onyń sózinshe, tirkelgen qylmystyq isterdiń barlyǵy birdeı sotqa jetpeıdi. Tergeý barysynda kúsh qoldaný nemese májbúrleý belgileri rastalmaǵan jaǵdaıda is toqtatylýy múmkin.
– Mysaly qyz alyp qashý faktisi boıynsha quqyq qorǵaý organdaryna týystary habarlasyp jatady. Biz birden tıisti sharalardy qabyldaımyz. Alaıda tergeý barysynda azamattardyń óz erkimen kelisim bergeni anyqtalsa jáne naqty májbúrleý áreketteri bolmaǵany dáleldense, mundaı ister sotqa joldanbaıdy, – dedi mınıstrlik ókili.
Sondaı-aq ol nekege májbúrleý faktileri elimizdiń barlyq óńirinde kezdesetinin, degenmen mundaı jaǵdaılar ońtústik jáne batys aımaqtarda jıirek tirkeletinin aıtty.
Eske sala keteıik, 2025 jylǵy qyrkúıekten bastap Qazaqstanda nekege májbúrleý qylmystyq quqyqbuzýshylyq retinde zańmen bekitilgen.
