Nekege májbúrlegender 10 jylǵa deıin sottalýy múmkin

ASTANA. KAZINFORM - QR Ádilet vıtse-mınıstri Laýra Mersalımova májbúrlep nekege otyrǵyzǵandar 10 jylǵa deıin sottalýy múmkin ekenin aıtty.

Májbúrli nekege ıtermeleý qylmystyq jaýapkershilikke ákep soǵady. Bul týraly Senat kýlýarynda Ádilet vıtse-mınıstri Laýra Mersalımova málim etti,

- Bul norma Memleket basshysy Ulttyq quryltaıda júktegen mańyzdy tapsyrmasynyń aıasynda qamtyldy. Ókinishke qaraı, qoǵamda mundaı keleńsiz jaǵdaılar kezdesip otyr. Qyzdy alyp qashý – tek dástúrli túsinik emes, bul biz oılaǵannan áldeqaıda kúrdeli quqyqtyq másele bolyp shyqty, – dedi L. Mersalımova Senatta tilshiler suraǵyna jaýap bere otyryp.

Osy oraıda ol Qylmystyq kodekstegi 125-bap – «Adam urlaý» boıynsha buǵan deıin tıisti jaza qarastyrylǵanyn eske saldy. Biraq ol bapta adam óz erkimen bosatsa, kináli tarap jazaǵa tartylmaıtyn jaǵdaı bar.

- Sondyqtan biz halyqaralyq tájirıbeni taldap, Qylmystyq kodekske arnaıy «Nekege májbúrleý» degen qylmystyq jaýaptylyqty qamtıtyn arnaıy bapty usyndyq. Eger adamdy nekege kúshtep tartsa, bolmasa ar-namysyna tıetin aqparatty jarııalaımyn dep qorqytsa, bul áreket endi qylmys sanalady, - ded vıtse-mınıstr.

Bul turǵyda jaza retinde 2 jyldan 10 jylǵa deıingi merzim qarastyrylǵan.

Budan buryn habarlanǵandaı, búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine Qazaqstannyń qylmystyq zańnamasyn ońtaılandyrý máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, maquldandy.

Zań aıasynda nekege turýǵa májbúrleý men «dropperlik» úshin qylmystyq jaýaptylyq engizildi.