Neke saraıy, aýrýhana, mýzeı: Almatyda qaraýsyz qalǵan ǵımarattar qashan jóndeledi
ALMATY. KAZINFORM — Almatyda biraz jyldar boıy qaraýsyz qalǵan ne jóndeý kórmegen ǵımarattar barshylyq. Olardyń qala kelbetine nuqsan keltiretini sózsiz.
Kazinform agenttigi jaýapty vedomstvolarǵa saýal joldap, qaladaǵy birneshe mańyzdy nysan boıynsha joba-jospardy anyqtady.
Byltyr Almatynyń Neke saraıy qaraýsyz qalǵanyn jazǵanbyz. Almaly aýdany Abaı dańǵylynyń boıynda ornalasqan ǵımarat 1971 jyly salynǵan.
2016 jyly Neke saraıy «Altyn dán Qazaqstan» kompanııasyna 20 jylǵa senimgerlik basqarýǵa berilgen, alaıda artylǵan mindetterdiń tolyq oryndalmaýyna baılanysty kelisimshart sot sheshimimen buzylǵan.
Keıingi jyldary syrt kelbeti nasharlaǵan nysan qazirgi ýaqytta Almaty qalasynyń memlekettik aktıvter basqarmasynyń ıeliginde.
Agenttik saýalyna jaýap bergen vedomstvo Neke saraıy 10 jylǵa senimgerlik basqarýǵa berilgenin habarlady.
Memlekettik aktıvter basqarmasynyń jaýabyna sáıkes, obekt memlekettik múlikti tıimdi basqarý, jóndeý jumystaryn júrgizý, sondaı-aq nysanǵa keminde 1 mlrd teńge ınvestıtsııa tartý maqsatynda berilgen.
— Almaly aýdany Abaı dańǵyly, 101A mekenjaıynda ornalasqan «Jas Otaý» neke saraıy elektrondy tender arqyly «Jar Jar Almaty» JShS-yna 10 jyl merzimge satyp alý quqyǵynsyz senimgerlik basqarýǵa berildi. Elektrondy tenderdiń talaptaryna sáıkes, senimgerlik basqarýǵa alǵan kompanııa shart jasalǵan sátten bastap bir jyl ishinde sáýlettik kelbetin saqtaı otyryp, ǵımarattyń qasbetine jóndeý jumystaryn júrgizýge, onyń aınalasyn abattandyrýǵa mindetti, — dep habarlady basqarmadan.
Sonymen qatar vedomstvo óz jaýabynda Neke saraıynyń nysanaly maqsaty ózgermeıtinin atap ótti.
— Tenderdiń sharttaryna sáıkes, nysan tek maqsatty baǵytta ǵana qoldanylady, — delingen jaýapta.
Temirjol aýrýhanasynyń taǵdyry
2023 jyly Almatynyń burynǵy ákimi Erbolat Dosaev Abaı men Masanshy kósheleriniń qıylysynda ornalasqan burynǵy temirjol aýrýhanasynyń ornynda balalardy ońaltý ortalyǵy ashylatynyn aıtqan edi.
Kóp jyldar qaraýsyz qalǵan ǵımarattyń búgingi jaǵdaıy múshkil. Ǵımarattyń qabyrǵasy kógerip, esik-terezesi synǵan.
Keıin ǵımarat aýmaǵy qorshalyp, nysan pasporty ilingen. Pasport boıynsha jóndeý jumystary 2024 jyldyń mamyrynda bastalyp, 2025 jyldyń jeltoqsan aıynda aıaqtalýy tıis edi.
Alaıda jobalaý-smetalyq qujattamany ázirleý belgilengen merzimde aıaqtalmaǵan soń qurylys jumystary 2024 jyldyń qazan aıyna aýystyryldy.
Degenmen qurylys jumystary búgingi deıin áli bastalǵan joq.
Almaty qalasynyń qurylys basqarmasy agenttik saýalyna jaýap bere otyryp, Balalardy ońaltý ortalaǵynyń jobasy memlekettik saraptamadan usynylǵan ýaqytta óte almaǵanyn málimdedi.
— Osy jyldyń 3 naýryzynda bul nysan boıynsha ázirlengen jobalaý-smetalyq qujattama «Memsaraptama» RMK portalyna saraptamadan ótý úshin júkteldi. Qazirgi tańda jobalaýshy uıym — «Jetisý sáýlet qurylysy» JShS jobalyq sheshimder boıynsha berilgen «Memsaraptama» mekemesiniń eskertýlerin pysyqtap jatyr. Qorytyndy berý ýaqyty — 2025 jylǵy 10 maýsym. Qorytyndy nátıjesine qaraı qurylysty qarjylandyrý máselesi qaralady, — delingen qurylys basqarmasynyń jaýabynda.
Olımpıadalyq dańq mýzeıi
Qalada nysandardyń biri — olımpıadalyq dańq mýzeıi. Seıfýllın jáne Bógenbaı batyr kósheleriniń qıylysynda ornalasqan Respýblıkalyq sport jáne olımpıadalyq dańq mýzeıiniń búgingi jaǵdaıyna qala turǵyndary shaǵymdanǵan bolatyn.
2016 jyldan beri jóndeý jumystary júrgizilmegen mýzeıge baılanysty Qazaq sport jáne týrızm akademııasy jaýap bergen edi.
— Murajaı ǵımaraty arhıtektýralyq eskertkishter sanatyna jatatyndyqtan biz «Qazqaıtajańǵyrtý» RMK talaptaryna sáıkes jáne osy mekemeniń arnaıy ruqsatynsyz ǵımarattyń syrtqy kelbetine kúrdeli jóndeý jumystaryn júrgize almaımyz. Biraq bizdiń mekemeniń sharýashylyq jumystarynyń josparyna sáıkes, osy jyldyń jaz mezgilinde jeńil jóndeý josparlanǵan, — dep habarlady akademııa.
Eske salaıyq, buǵan deıin Almatynyń «Atakent» aýmaǵyndaǵy jer telimi memleket qajetine alynatynyn jazǵanbyz.