Neke kodeksiniń jobasy úshinshi oqylymda talqylanatyn bolady
ASTANA. Maýsymnyń 23-i. QazAqparat /Qanat Mámetqazyuly/ - «Neke (erli-zaıyptylyq) jáne otbasy týraly» QR Kodeksi jobasy úshinshi oqylymda talqylanatyn boldy. Búgin QR Parlamenti Májilisiniń jalpy otyrysynda palata depýtattary osyndaı sheshim qabyldady,
dep habarlaıdy QazAqparat.
Esterińizge sala keteıik, Kodeks jobasy neke jáne otbasy zańnamasyn jetildirý jáne ondaǵy olqylyqtardy joıý, sondaı-aq onyń normalaryn halyqaralyq standarttarǵa sáıkes keltirý qajettiligine baılanysty ázirlengen. Jańa Kodeks jobasy 279 baptan turady. Qujatta «erli-zaıyptylyq», «ákesin, ákeligin anyqtaý», «sýrrogat ana», «qosalqy reprodýktıvti ádister men tehnologııalar», «bala asyrap alý jónindegi agenttikter» degen uǵymdarǵa jańa aıqyndamalar berildi.
Sol sekildi joba otbasy men balanyń múddelerin qorǵaýǵa baǵyttalǵan birqatar jańa normalardy qamtyp otyr. Atap aıtqanda, bul normalar zańmen qorǵalatyn, azamattardyń jeke jáne otbasy ómiriniń qupııasyn kózdeıtin jaǵdaılarǵa sáıkes bolyp tabylady. Sondaı-aq jobada bala asyrap alý jónindegi taraý eleýli túrde qaıta óńdelip, onda asyrap alýshynyń quqyqtary men mindetteri jáne osy tártip bóligindegi jańa normalarmen tolyqtyryldy. Budan basqa, Qazaqstannyń óz ishinde bala asyrap alýdy yntalandyrý maqsatymen birqatar ózgerister qamtyldy. Máselen, jobada qorǵanshylarǵa (qamqorshylarǵa) ata-analarynyń qamqorlyǵynsyz qalǵan balany kútip-baǵýǵa arnalǵan járdemaqy taǵaıyndaý jáne tóleý tetigin ázirleý týraly usynystar kórinis tapty.
Ekinshi oqylymǵa ázirleý barysynda palata depýtattary tarapynan 100-den astam usynystar kelip túsken. Budan bólek jobany talqylaý barysynda birqatar tolyqtyrýlar engizilý qajettigi týyndady. Osyǵan oraı, atalǵan joba úshinshi oqylymǵa ázirlenetin bolyp kelisildi.
