Neke buzǵandarǵa memlekettik baj mólsheri artady
ASTANA. KAZINFORM – Nekeni buzǵan kezde tólenetin memlekettik baj mólsheri artady. Bul týraly Májilis depýtattarynyń saýalyna Premer-mınıstr Oljas Bektenovtiń jaýabynda aıtylǵan.
— Qazirgi kúni jańa Salyq kodeksiniń jobasy Parlament Senatynda qaralyp jatyr. Jobada nekeni buzǵany úshin memlekettik baj mólsheri 5 AEK-ke (19 660 teńge) deıin ulǵaıtylý qarastyrylǵan. Úkimet dástúrli otbasy qundylyqtaryn ilgeriletý boıynsha júıeli jumys istelip jatyr. Otbasy jáne neke ınstıtýtyn saqtaý men nyǵaıtýdyń 2025-2027 jyldarǵa arnalǵan is-sharalar jospary bekitilgen. Otbasylyq kelispeýshilikterdi sheshýdiń balamaly tásili retinde óńirlik sottar janyndaǵy Bıler (aqsaqaldar) keńesiniń qyzmeti jandandyryldy. Keńes qoǵamdaǵy yntymaqtastyq pen birlikti nasıhattaý, janjaldasý deńgeıin tómendetý, daýlardy sheshýde qazaq bıleriniń tájirıbesin paıdalaný, turmystyq daýlaryn sotqa jetkizbeı, eki jaqty tatýlastyrý jumysyn isteıdi, — dedi Oljas Bektenov jaýabynda.
Onyń dereginshe, atalǵan keńester birqatar óńirde (Atyraý, Abaı, Shyǵys Qazaqstan, Jambyl, Jetisý, Batys Qazaqstan, Qaraǵandy, Qostanaı, Qyzylorda, Mańǵystaý, Pavlodar jáne Túrkistan oblystarynda) jumys isteıdi. Sonymen qatar Mádenıet jáne aqparat mınıstrligi Joǵarǵy sotpen birge «Baqytty otbasy» jobasyn iske asyryp jatyr. Joba aıasynda psıhologtar, zańgerler, medıatorlar jáne áleýmettik qyzmetkerler keńester berip, medıatıvti kelisimder júrgizedi.
— Óńirlik ákimdikter janynda áıelder isteri jáne otbasylyq saıasat jónindegi óńirlik komıssııalar qyzmet atqarady. Komıssııa quramyna ÚEU, analar, ákeler keńesi, óńir belsendileri, kásipkerler jáne jastar engizilgen. Otbasy qundylyqtaryn dáripteý maqsatynda «Birtutas tárbıe» baǵdarlamasy aıasynda bilim berý uıymdarynda Ata-analardy pedagogıkalyq qoldaý ortalyqtary jumys isteıdi, tsıfrlyq platformasy ázirlendi, — dedi Úkimet basshysy.
Aıta keteıik, byltyr 124 myń juptyń nekesi qıylsa, 61 jup ajyrasýǵa ótinim bergen.