Negizsiz járdemaqylardyń kóbeıýi memlekettik basqarýdyń álsizdigin kórsetedi – Toqaev
ASTANA. KAZINFORM – Memleket basshysy Qasym-Jomart Toqaev áleýmettik tólemderdiń kóbeıýin memlekettik basqarýdaǵy álsizdiktiń belgisi dep atady. Prezıdent negizsiz járdemaqylar men tólemderdiń kóbeıýi memlekettik qarjynyń maqsatsyz jumsalýyna jáne áleýmettik nysandar tapshylyǵynyń kúsheıýine ákelgenin aıtty.
Onyń aıtýynsha, «Halyqtyq qurylys» bastamasynyń qajettiligi tek ekonomıkalyq mindettermen baılanysty emes. Munda jyldar boıy qordalanǵan qurylymdyq máseleler de bar.
– Halyq sanynyń artýy men el ishindegi kóshi-qon áleýmettik nysandarǵa túsetin júktemeni arttyryp otyr. Basym kópshiligi onsyz da shegine jetkenshe jumys istep tur. Bul másele keshe ǵana paıda bolǵan joq, – dep atap ótti Prezıdent.
Prezıdent ondaǵan jyldar boıy memlekettik basqarýdaǵy qatelikter men kemshilikterdi jasyrý úshin áleýmettik kómekti kóbeıtip, halyqtyń kóńilin tabýǵa tyrysý jıi kezdeskenin aıtty.
Sonyń saldarynan memlekettik qarjy maqsatsyz jumsaldy: kómekke muqtaj emes, turmysy jaqsy otbasylar da túrli tólemder alyp otyrdy. Al qoljetimdi mektepter men aýrýhanalar tapshylyǵy údeı tústi.
– Mundaı saıasat qoǵamda memlekettiń kómegine arqa súıeıtin masyldyq kózqarastyń qalyptasýyna yqpal etti. Sonymen qatar áleýmettik qamsyzdandyrý júıesinde zańsyz paıda tabý men jemqorlyqqa jol ashty. Negizsiz járdemaqylar men tólemderdiń shamadan tys kóbeıýi memlekettik basqarý júıesiniń áli de jetilmegenin, tipti álsizdigin kórsetedi. Bul – ulttyń jarqyn bolashaǵyn aldyn ala oılastyryp, uzaq merzimdi jospar qurýǵa jetkilikti mán berilmegeniniń belgisi, – dedi Qasym-Jomart Toqaev.
Onyń aıtýynsha, bıýdjet qarjysy esebinen halyqqa kómekteskendeı kóriný – baryp turǵan popýlızm.
Mundaı jalǵan janashyrlyqtyń tasasynda halyqtyń múddesine jáne eldiń turaqty damýyna nuqsan keltiretin túrli aıla-sharǵy jatýy múmkin.
– Bul – tek búgingi kúnniń qamyn oılap, bolashaqty baǵamdaı almaıtyn, memlekettik múddeni keń turǵydan túsinbeıtin adamdardyń kózqarasy. Sondyqtan áleýmettik saıasatty túbegeıli qaıta qarap, ony ýaqytsha máselelerdi sheshýge emes, uzaq merzimdi strategııalyq maqsattarǵa baǵyttaý mańyzdy, – dedi Memleket basshysy.
Buǵan deıin Prezıdent Qazaqstannyń tranzıttik áleýetin synǵa alǵan edi.
Sondaı-aq Prezıdent orynsyz shyǵyndy boldyrmaý úshin JI paıdalanýdy usyndy.
