Negizsiz ústemeaqy, qate derekter kórsetý, «óli jandarǵa» jalaqy aýdarý – bilim berý uıymdaryndaǵy bylyqtar
ASTANA. KAZINFORM – Oqý-aǵartý mınıstrligi bilim berý uıymdarynda muǵalimderdiń eńbekaqy qorynan bıýdjet qarajatyn jymqyrý shemasyn jarııa etti.
«Qazirgi ýaqytta mınıstrlik sybaılas jemqorlyq táýekelderine jol bermeý maqsatynda birqatar is-sharalardy iske asyrýda. 2023 jyly Sybaılas jemqorlyqqa qarsy agenttigi (budan ári – Agenttik) bilim berý salasyndaǵy sybaılas jemqorlyq táýekelderine syrtqy taldaý júrgizdi. Nátıjesinde mınıstrlik agenttikpen birlesip, bilim berý salasyndaǵy bıýdjet qarajatyn josparlaý men ıgerý kezinde sybaılas jemqorlyq táýekelderine jol bermeý tetikterin ázirleý boıynsha uıymdastyrý is-sharalarynyń josparyn (Jol kartasy) bekitti. Syrtqy taldaýdyń qorytyndysy boıynsha bilim berý uıymdarynda muǵalimderdiń eńbekaqy qorynan bıýdjet qarajatyn jymqyrý shemasy ashyldy. Atap aıtqanda, bilim berý uıymdary qyzmetkerlerine eńbekaqy josparlaý kezinde negizsiz ústemeaqylar belgileý arqyly normadan artyq qarjy josparlaý, sondaı-aq durys emes derektemeler kórsetý, onyń ishinde basqa tulǵanyń kart-shoty kórsetilip úshinshi tulǵalarǵa qarajat esepteý arqyly bıýdjet qarajatyn jymqyrý faktilerine jol berilgendigi belgili boldy. Osylaısha, bıýdjetten bólingen qarajatty urlaý jalǵan derektemeler boıynsha (bir tulǵanyń T.A.Á., tólem shottaryndaǵy basqa tulǵanyń kart-shoty kórsetile otyryp) nemese úshinshi tulǵalarǵa jáne «óli jandarǵa» artyq eseptelgeni anyqtaldy», - dep atap ótedi Oqý-aǵartý vıtse-mınıstri Edil Ospan Májilis depýtattarynyń saýalyna bergen jaýabynda.
Onyń atap ótýinshe, osyndaı zań buzý shemalaryn joıý maqsatynda mınıstrlik Qarjy mınıstriligimen jáne ákimdiktermen birlesip mynadaı jumystar júrgizip jatyr:
1) «Qazynashylyq-klıent» aqparattyq júıesin jeke tulǵalardyń memlekettik derekter bazasymen ıntegratsııalaý arqyly árbir qyzmetkerdiń jeke sáıkestendirý nómerin eńbekaqy tóleý vedomostarynda kórsetilgen derektermen sáıkestigin avtomatty túrde tekserý tásilin engizý;
2) bıýdjettik ótinimderdi qalyptastyrý jáne bekitý protsesin avtomattandyrý, ıaǵnı bilim alýshylar kontıngenti boıynsha málimetterdi avtomatty túrde salystyrý úshin qazynashylyq aqparattyq júılerin «Ulttyq bilim berý derekter bazasy» aqparattyq júıesimen (budan ári – «UBBDB» AJ) ıntegratsııalaý;
3) bilim berý salasynyń qyzmetkerleri bolyp tabylmaıtyn úshinshi tulǵalarǵa qarajat esepteý táýekelderin boldyrmaý maqsatynda «UBBDB» AJ bazasynda bilim berý salasynda personaldy basqarýdyń biryńǵaı avtomattandyrylǵan elektrondyq júıesin qalyptastyrý.
«Pedagog mártebesi týraly» Qazaqstan Respýblıkasy Zańynyń 6-babynyń 2-tarmaǵynyń 4-tarmaqshasyna sáıkes pedagog kásiptik qyzmetin júzege asyrý kezinde, oǵan taýarlar men kórsetiletin qyzmetterdi satyp alý boıynsha mindetti júkteýge jol berilmeıdi. Osylaısha, mektepterdegi muǵalimderden qarajat jınaý – bul zańsyz áreketter. Mundaı faktiler týyndaǵan kezde muǵalimder bilim berý salasyndaǵy ýákiletti organdarǵa júginýge quqyly», - dedi vıtse-mınıstr.
