Negizgi UBT: talapkerlerdiń 70% shekti ball jınady

ASTANA. KAZINFORM — Ǵylym jáne joǵary bilim mınıstrligi negizgi Ulttyq biryńǵaı testileýdiń kezekti nátıjesin jarııalady.

Mınıstrliktiń málimetine súıensek, bıyl 16 mamyrda negizgi UBT bastalǵaly 214 myńǵa jýyq testileý ótti. Talapkerlerdiń 74%-y testileýdi qazaq tilinde, 26%-y orys tilinde jáne 182 túlek aǵylshyn tilinde tapsyrdy. 

Tórt aptanyń qorytyndysy boıynsha talapkerlerdiń 70%-y shekti ball jınady. Bes pán boıynsha ortasha ball 66-ny qurady. Eń joǵary nátıje — 140 ball — Túrkistan oblysynan Ábilhan Jánibekke buıyrdy.

Talapkerlerdiń basym bóligi, atap aıtqanda, 18%-y «Matematıka-Fızıka», 15%-y «Bıologııa-Hımııa» pánderin jáne 14%-y shyǵarmashylyq emtıhandy tańdady. Erekshe bilim berý qajettiligi bar 592 talapker UBT-da baǵyn synady. 

— Talapkerler testileý aıaqtalǵannan keıin 30 mınýt ishinde apellıatsııaǵa berý quqyǵy bar. Tehnıkalyq sebepten apellıatsııa tikeleı testileý kezinde qabyldanady. Nátıjeleri bar sertıfıkattar apellıatsııa qarastyrylǵannan keıin jeke kabınetten qaraýǵa múmkindigi bar. Negizgi UBT bastalǵaly tórt aptada 304 ereje buzýshylyq anyqtaldy. 146 talapker smartfon, shpargalka jáne basqa da tyıym salynǵan zattardy alyp kirmek bolǵany úshin testileýden shettetildi. Taǵy 157 adam testileý kezinde erejelerdi buzǵany úshin aýdıtorııadan shyǵarylyp, nátıjeleri joıyldy. Sondaı-aq 1 talapkerdiń sertıfıkaty testileý beınejazbasyn tekserý nátıjesinde joıyldy. Bógde adamnyń kirý faktisi anyqtalǵan joq, — delingen habarlamada.

Eske salaıyq, bıylǵy UBT aıaqtalǵannan keıin 31 qazanǵa deıin beınejazbalarǵa taldaý júrgiziledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda UBT nátıjeleri joıylady.

Aıta ketsek, bıyl Ulttyq biryńǵaı testileý tapsyrýǵa 216 myń talapker ótinish berdi. 

Ulttyq biryńǵaı testileýdiń buǵan deıingi kezeńinde 142 ereje buzýshylyq anyqtalǵany týraly jazǵan edik.