Negizgi UBT-ǵa ótinish qashan qabyldanatyny anyqtaldy
ASTANA. KAZINFORM — Negizgi UBT-ǵa ótinishterdi qabyldaý 11-25 sáýir aralyǵynda júzege asyrylady. Osy kezeńde talapkerlerge negizgi UBT-ny eki ret tapsyryp, eń joǵary nátıjesimen grant konkýrsyna qatysý múmkindigi beriledi, dep habarlaıdy Ǵylym jáne joǵary bilim mınıstrliginiń baspasóz qyzmeti.
11-16 sáýir aralyǵynda ótinishti bir ret, al 17-25 sáýir aralyǵynda qalaýy boıynsha ekinshi ret bere alady. Testileýdiń ózi 10 mamyr men 10 shilde aralyǵynda ótedi.
UBT-ǵa qatysý úshin ótinish qabyldaý Ulttyq testileý ortalyǵynyń app.testcenter.kz saıty nemese UTO.kz qosymshasy júrgiziledi. Talapkerlerge testileý kúnin, ýaqytyn jáne pýnktin tańdaý múmkindigi berilgen. Bul rette olar eki múmkindik úshin beıindik pánderdiń bir kombınatsııasyn tańdaıalady.
Negizgi UBT-ǵa daıyndyq deńgeıin arttyrý úshin qańtar jáne naýryz UBT-laryn tapsyrǵan talapkerlerge ár pán boıynsha jeke taqyryptyq taldaý usynylǵan, ıaǵnı, árbir UBT-dan keıin (qańtar, naýryz) túlekter ózderiniń álsiz tustaryn anyqtap, sol baǵytta daıyndalyp, bilimderin jetildirýge múmkindik alady. Sondaı-aq, birinshi múmkindikti tapsyrǵannan keıin, olarda ekinshi testileýge daıyndyqty jaqsartý úshin ýaqyt bolady.
Odan bólek, Ulttyq testileý ortalyǵynyń saıtynda baıqaý synaqtary iske qosyldy jáne test tapsyrmalary qurastyrylǵan ádebıetter tizimi men test jospary; «Qazaqstan tarıhy» jáne «Dúnıejúzi tarıhy» pánderi boıynsha 100 tarıhı data tizimi; «Informatıka» páninen termınder tizimi; «Qazaq ádebıeti» jáne «Orys ádebıeti» boıynsha ádebı shyǵarmalar tizimi jarııalandy.
2026 jyly Ulttyq biryńǵaı testileýdiń formaty ózgerissiz qalady. Talapkerler úsh mindetti jáne tańdaýy boıynsha eki beıindik pándi tapsyrady. UBT tapsyrmalarynyń jalpy sany — 120. Onyń ishinde «Qazaqstan tarıhy» páni boıynsha 20 tapsyrma, «Oqý saýattylyǵy» men «Matematıkalyq saýattylyq» pánderinen 10 tapsyrmadan, sondaı-aq eki beıindik pánniń árqaısysynan 40 tapsyrmadan beriledi. UBT boıynsha eń joǵary ball 140 baldy quraıdy.
Testileý ýaqyty — 4 saǵat (240 mınýt). Bul rette erekshe bilim berý qajettilikteri bar balalar úshin usynylatyn qosymsha 40 mınýt ýaqyt saqtalatynyn aıta ketý kerek.
Emtıhan kezinde testileý baǵdarlamasynda kalkýlıator, hımııalyq elementterdiń perıodtyq júıesi jáne tuzdardyń erigishtik kestesi qoljetimdi bolady. Sonymen qatar, talapkerlerge yńǵaıly bolý úshin kestelerdiń qaǵaz nusqalary da beriledi.
Test tapsyrýshylar testileý aıaqtalǵannan keıin 30 mınýt ishinde apellıatsııaǵa ótinish bere alady. Apellıatsııaǵa ótinish bergen testilenýshilerdiń sertıfıkaty apellıatsııalyq komıssııanyń sheshiminen keıin talapkerdiń jeke kabınetinde qoljetimdi bolady.
Mınımaldy shekti baldar ózgerissiz qaldy. Ulttyq joǵary oqý oryndaryna túsý shekti baly — 65 ball, basqa JOO-larǵa 50 ball, «Pedagogıkalyq ǵylymdar» bilim berý salasy boıynsha — 75 ball, «Densaýlyq saqtaý» bilim berý salasy boıynsha — 70 ball, «Quqyq» daıarlaý baǵyty boıynsha — 75 ball. Bul rette «Qazaqstan tarıhy» jáne UBT-nyń eki beıindik páni jáne (nemese) shyǵarmashylyq emtıhan boıynsha keminde 5 ball, al «Oqý saýattylyǵy» men «Matematıkalyq saýattylyq» pánderi boıynsha keminde 3 baldan jınaý qajet. Joǵary oqý oryndary bilim berý baǵdarlamalarynyń toptary boıynsha ózderiniń shekti baldaryn belgileı alatynyn aıta ketken jón.
Qaýipsizdikti qamtamasyz etý jáne buzýshylyqtardyń aldyn alý maqsatynda testileýge kire beriste tyıym salynǵan zattardy, mysaly, telefondardy, shpargalkalardy jáne t. b. alyp kirýge jol bermeý úshin qol jáne ramalyq metall izdegishter qoldanylady.
Testileý aýdıtorııalarynda ruqsat etilgen magnıttik tolqyndar sheginde mobıldi jáne radıoelektrondy baılanys sıgnaldaryn basatyn qurylǵylar paıdalanylady, sondaı-aq beınebaqylaý júrgiziledi.
2026 jylǵy UBT aıaqtalǵannan keıin, 31 qazanǵa deıin beınejazbalarǵa taldaý júrgiziledi. Tyıym salynǵan zattardy paıdalaný nemese basqa da erejelerdi buzý faktileri anyqtalǵan jaǵdaıda, oqýǵa túsýshiniń UBT nátıjeleri joıylady.
Budan buryn qazaqstandyq talapkerler Ázerbaıjan grantyn ıelengenin jazǵanbyz.
