Negizgi UBT bastalǵaly ortasha ball — 64, eń joǵarǵy — 136 boldy

ASTANA. KAZINFORM — Negizgi UBT bastalǵannan beri 30 myńnan astam adam test tapsyrdy. Onyń ishinde talapkerlerdiń 69% — qazaq tilinde, 31% — orys tilinde, 40 adam — aǵylshyn tilinde testileýden ótti. UBT bastalǵaly shekti baldy 71% talapker jınady. 

Ortasha ball — 64. Eń joǵary ball — 136.

16 mamyrda bastalǵan 2024 jylǵy negizgi UBT-nyń birinshi aptasy aıaqtaldy.

Esterińizge sala ketsek, testileýge qatysýǵa 186 myń talapkerden 342 myńǵa jýyq ótinish kelip tústi.

Qazirgi tańda testke qatysýshylardyń basym bóligi, atap aıtqanda, 20%-y «Shyǵarmashylyq emtıhan», 18%-y «Matematıka-Fızıka» pánder kombınatsııasyn tapsyrdy.

11%-y «Matematıka-Informatıka» kombınatsııasyn tańdaǵan.

Eń az tańdalǵan kombınatsııa — «Hımııa-Fızıka», ony 45 adam tapsyrǵan.

Erekshe bilim berý qajettiligi bar oqýǵa túsýshiler úshin qolaıly jaǵdaı jasaýdyń arqasynda UBT-ǵa birinshi aptada 102 talapker qatysqanyn aıta ketken jón.

Talapkerler testileý aıaqtalǵannan keıin 30 mınýt ishinde apellıatsııaǵa bere alady.

Sertıfıkat apellıatsııa týraly sheshim qabyldanǵannan keıin testilenýshiniń jeke kabınetinde qoljetimdi bolady.

Búgingi tańda 41 ereje buzýshylyq anyqtaldy.

Onyń ishinde 32 talapker smartfon, shpargalka jáne basqa da tyıym salynǵan zattardy alyp ótý áreketi saldarynan test tapsyrý múmkindiginen aıyryldy.

Testileý kezinde ereje buzǵany úshin aýdıtorııadan 9 adam shyǵarylyp, nátıjesi joıyldy. Ózge tulǵalar anyqtalǵan joq.

Aıta ketsek, 2024 jylǵy UBT aıaqtalǵannan keıin kúntizbelik jyldyń 31 qazanyna deıin testileýdiń beınejazbasyna taldaý júrgiziledi.

Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda túsýshiniń UBT nátıjesi joıylady.