Negizgi UBT bastalǵaly 246 talapker tyıym salynǵan zattarmen ustaldy
ASTANA. KAZINFORM — 2026 jyldyń 10 mamyrynda bastalǵan negizgi UBT 187 myńǵa jýyq ret tapsyryldy, dep habarlaıdy Ǵylym jáne joǵary bilim mınıstrliginiń baspasóz qyzmeti.
Talapkerlerdiń 73%-y testileýdi qazaq tilinde, 27%-y orys tilinde jáne 323 ret aǵylshyn tilinde tapsyrdy.
Tórtinshi aptanyń qorytyndysy boıynsha talapkerlerdiń 67%-y shekti ball jınady. Bes pán boıynsha ortasha ball 64 baldy qurady. Eń joǵary nátıje — 140 ball, ony Pavlodar oblysynyń túlegi Áset Altaır jınady.
Erekshe bilim berý qajettilikteri (EBQ) bar oqýǵa túsýshiler úshin qolaıly jaǵdaı jasaýǵa erekshe kóńil bólinedi. UBT-ǵa EBQ bar 556 talapker qatysty.
Talapkerlerdiń test tapsyrmalarynyń mazmuny boıynsha testileý aıaqtalǵannan keıin 30 mınýt ishinde apellıatsııaǵa berý quqyǵy bar. Tehnıkalyq sebepter boıynsha apellıatsııa tikeleı testileý kezinde qabyldanady. Nátıjeleri bar sertıfıkattar apellıatsııa qarastyrylǵannan keıin jeke kabınetterde qoljetimdi bolady.
— UBT-ny ótkizýdiń tórt aptasynda 391 ereje buzýshylyq anyqtaldy. 246 talapker smartfondardy, smart kózildirikterdi, mıkro qulaqqaptardy, shpargalkalardy jáne basqa da tyıym salynǵan zattardy alyp kirmek bolǵany úshin testileýden shettetildi. Taǵy 145 adam testileý kezinde erejelerdi buzǵany úshin aýdıtorııadan shyǵaryldy, olardyń nátıjeleri joıyldy. Ózge adamdardyń ornyna kirý faktileri anyqtalǵan joq, — delingen habarlamada.
2026 jylǵy UBT aıaqtalǵannan keıin kúntizbelik jyldyń 31 qazanyna deıin beınejazbalarǵa taldaý júrgiziledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda UBT nátıjeleri joıylady.
Esterińizge sala ketsek, 240 myńǵa jýyq talapker testileýge qatysýǵa eki múmkindikti esepke alǵanda 446 myńnan astam ótinish bergen.
Osydan buryn áskerı boryshyn ótegender UBT tapsyrmaı-aq joǵary oqý ornyna túse alatynyn jazǵan edik.
