Negizgi UBT aıaqtaldy: 821 talapker 130 baldan joǵary nátıje kórsetti
ASTANA. KAZINFORM — Talapkerlerdiń 76%-y shekti ball jınap, granttar konkýrsyna qatysý quqyǵyna ıe boldy.
Memlekettik bilim berý granttary ıegerleriniń tizimi jarııalanar qarsańynda Ǵylym jáne joǵary bilim mınıstrligi Ulttyq testileý ortalyǵy dırektorynyń orynbasary Naýjan Dıdarbekova 2026 jylǵy negizgi Ulttyq biryńǵaı testileýdiń qorytyndylary, testileýdi uıymdastyrý erekshelikteri jáne talapkerlerdiń kórsetken nátıjeleri týraly aıtyp berdi.
Bıylǵy negizgi UBT-ǵa 233 myńǵa jýyq talapker qatysyp, olarǵa testileýdi eki ret tapsyryp, eń joǵary nátıjesimen memlekettik bilim berý granttary konkýrsyna qatysý múmkindigi berildi. Nátıjesinde talapkerlerdiń 76%-y shekti ball jınap, granttar konkýrsyna qatysý quqyǵyna ıe boldy.
— UBT qorytyndysy boıynsha eń joǵary — 140 baldy Pavlodar oblysynyń túlegi Áset Altaır men Qyzylorda oblysynyń túlegi Balhan Alfııa (QAZTEST nátıjelerin konvertatsııalaý arqyly) ıelendi. Sondaı-aq 821 talapker 130 baldan joǵary nátıje kórsetti, — delingen habarlamada.
Erekshe bilim berý qajettilikteri bar talapkerler úshin qajetti jaǵdaılar jasalyp, negizgi UBT-ǵa 800 adam qatysty.
Qazirgi ýaqytta Respýblıkalyq komıssııa óz jumysyn aıaqtady. Talapkerlerdiń UBT sertıfıkattary jeke kabınetterinde qoljetimdi.
Aıta ketelik bilim granty ıegerleriniń tizimi 7 tamyzda jarııalanady.
