Negizgi UBT: 300-ge jýyq talapker testileýden shettetildi
ASTANA.KAZINFORM - Bıyl 10 mamyrda bastalǵan negizgi UBT 236 myńǵa jýyq ret tapsyryldy. Talapkerlerdiń 72%-y testileýdi qazaq tilinde, 28%-y orys tilinde jáne 408 ret aǵylshyn tilinde tapsyrdy.
Besinshi aptanyń qorytyndysy boıynsha talapkerlerdiń 67%-y shekti ball jınady. Bes pán boıynsha ortasha ball 64 ball boldy. Eń joǵary nátıje – 140 ball. Ony Pavlodar oblysynyń túlegi Áset Altaır jınady.
Ǵylym jáne joǵary bilim mınıstrligi málimetinshe, erekshe bilim berý qajettilikteri (EBQ) bar oqýǵa túsýshiler úshin qolaıly jaǵdaı jasaýǵa erekshe kóńil bólinedi. UBT-ǵa EBQ bar 668 talapker qatysty.
Talapkerlerdiń test tapsyrmalarynyń mazmuny boıynsha testileý aıaqtalǵannan keıin 30 mınýt ishinde apellıatsııaǵa berý quqyǵy bar. Tehnıkalyq sebepter boıynsha apellıatsııa tikeleı testileý kezinde qabyldanady. Nátıjesi bar sertıfıkattar apellıatsııa qarastyrylǵannan keıin jeke kabınetterde qoljetimdi bolady.
UBT-ny ótkizýdiń bes aptasynda 474 ereje buzýshylyq anyqtaldy. 298 talapker smartfondardy, smart kózildirikterdi, mıkro qulaqqaptardy, shpargalkalardy jáne basqa da tyıym salynǵan zattardy alyp kirmek bolǵany úshin testileýden shettetildi. Taǵy 176 adam testileý kezinde erejelerdi buzǵany úshin aýdıtorııadan shyǵaryldy, olardyń nátıjeleri joıyldy. Ózge adamdardyń ornyna kirý faktileri anyqtalǵan joq.
2026 jylǵy UBT aıaqtalǵannan keıin kúntizbelik jyldyń 31 qazanyna deıin beınejazbalarǵa taldaý júrgiziledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda UBT nátıjeleri joıylady.
Esterińizge sala ketsek, 240 myńǵa jýyq talapker testileýge qatysýǵa eki múmkindikti esepke alǵanda 446 myńnan astam ótinish bergen.
UBT-ǵa qatysý úshin 239 myńnan astam adam tirkelgenin jazǵan edik. Onyń ishinde kolledj túlekteri men ótken jyldardyń mektep bitirýshileri de bar.
