Negizgi kapıtalǵa salynǵan ınvestıtsııa kólemi 14,3% artty

ASTANA. KAZINFORM — 2025 jylǵy qańtar–tamyz aılarynda negizgi kapıtalǵa salynǵan ınvestıtsııalar kólemi 11 543,1 mlrd teńge bolyp, 2024 jyldyń sáıkes kezeńimen salystyrǵanda 14,3 % ósken. Bul týraly Ulttyq statıstıka bıýrosynyń baspasóz qyzmeti habarlady. 

Investıtsııanyń basty kózi kásiporyndardyń óz qarajaty – 7 320,3 mlrd teńge nemese jalpy kólemniń 63,4%. Bıýdjet qarajaty 23% qurap, ótken jylmen salystyrǵanda 42,6% artqan. Bankterdiń qarjylandyrý úlesi – 3,5%.

Investıtsııa ósiminiń eń joǵarǵy kórsetkishi Aqmola oblysynda (49,3%), Aktóbe oblysynda (38,7%), Astana qalasynda (35,8%), Jambyl oblysynda (32,4%) jáne Almaty qalasynda (26,1%) baıqaldy.

Qarajattyń basym bóligi ǵımarattar men qurylystardyń salynýyna jáne kúrdeli jóndeýine baǵyttaldy – 68,3%. Mashınalar, jabdyqtar jáne kólik quraldaryn alýǵa jalpy shyǵynnyń 27,2% jumsalǵan.

Salalar boıynsha negizgi kapıtalǵa salynǵan ınvestıtsııanyń eń kóp úlesi ónerkásipke (37,3%) tıesili (onyń ishinde taý-ken óndirý ónerkásibi men karerlerdi ıgerý – 15,7%, óńdeý ónerkásibi – 11%), odan bólek jyljymaıtyn múlik operatsııalary (19,4%), kólik jáne qoıma (18%), bilim berý salasy (7,3%) da aıtarlyqtaı úleske ıe. 

Aıta ketelik 8 aıda negizgi kapıtalǵa 11,5 trln teńge ınvestıtsııa tartylǵan edi.