Negizgi 3 munaı kompanııasy jyldyq jospardy nelikten oryndaı almady
ASTANA. KAZINFORM – Jyl qorytyndysy boıynsha munaı óndirý 87,8 mln tonna deńgeıinde josparlanǵan. Bul týraly búgin Úkimet otyrysynda Energetıka mınıstri Almasadam Sátqalıev aıtty.
- 2024 jylǵy qańtar-qarasha aıynda munaı men kondensat óndirý kólemi 80,5 mln tonnany nemese ótken jyldyń sáıkes kezeńimen salystyrǵanda 98 paıyzdy qurady, - dedi mınıstr.
Mınıstrdiń dereginshe, munaı-gaz salasynyń iri kompanııalary óndirgen ónim kólemi mynadaı:
• Teńiz ken ornynda atalǵan kezeńde 25,9 mln tonna;
• Qashaǵanda 15,8 mln tonna;
• Qarashyǵanaqta 11,1 mln tonna munaı óndirildi.
- Ótken jylmen salystyrǵanda óndirý deńgeıiniń tómendeýine 2024 jyly iri ken oryndarynda kúrdeli jóndeýler júrgizý áser etti: Teńizde Keleshekte keńeıtý jobasynyń josparlanyp otyrǵan iske qosylýyna baılanysty mamyr jáne tamyz aılarynda jalpy uzaqtyǵy 50 kún, Qashaǵanda 21 kúnge tolyq toqtaı otyryp, slag-ketcherdi aýystyrý boıynsha jóndeý júrgizildi. Budan basqa, Qarashyǵanaq ken ornyndaǵy óndiristiń tómendeýine jospardan tys toqtatýlar men Orynbor gaz óńdeý zaýytynyń gazdy qabyldaýdy shekteýi, Kaspıı qubyr konsortsıýmynyń josparly-profılaktıkalyq jumystarǵa toqtaýy áser etti, - dedi Almasadam Sátqalıev.
Onyń dereginshe, atalǵan jaıttarǵa baılanysty jyl qorytyndysy boıynsha munaı óndirý 87,8 mln tonna deńgeıinde kútiledi.
- Josparly óndirý kórsetkishine qol jetkizbeý munaı eksporttaýǵa da áser etti. Máselen, esepti kezeńde 63,2 mln tonna munaı eksporttaldy nemese ótken jyldyń sáıkes kezeńimen salystyrǵanda 98,3 paıyz, - dedi ol.