Negizsiz baǵa ósimine jol bermeý máselesi udaıy baqylaýda tur - E. Dosaev
ASTANA. QazAqparat - Negizsiz baǵa ósimine jol bermeý máselesi udaıy baqylaýda tur. Bul týraly búgin Premer-Mınıstr Kárim Másimovtiń jetekshiligimen ótken Úkimet otyrysynda QR Ulttyq ekonomıka mınıstri Erbolat Dosaev málim etti.
Keltirilgen aqparattarǵa qaraǵanda, 2015 jyldyń 24 qazanyndaǵy jaǵdaı boıynsha turaqtandyrý qoryndaǵy azyq-túlik taýarlarynyń qory 42,3 myń tonnany quraıdy. Onyń ishinde kartop - 16,5 myń tonna, 1 surypty un - 9,4 myń tonna, qant - 3,7 myń tonna, pııaz - 5,3 myń tonna, kúrish - 2,5 myń tonna, ósimdik maıy - 1,6 myń tonnany quraıdy.
«Áleýmettik mańyzdy azyq-túlik taýarlar qorlary Ońtústik Qazaqstan oblysynda jalpy qordyń 21,1 paıyzyn, Qyzylorda oblysy - 14,5 paıyzyn, Batys Qazaqstan oblysynda turaqtandyrý qorlarynyń 13,1 paıyzyn quraıdy. Bul kórsetkish Jambyl, Shyǵys Qazaqstan oblysynda 7 - 5 paıyz aralyǵynda, al Almaty qalasynda 2,4 myń tonnany quraıdy», - dedi mınıstr.
Onyń aıtýynsha, aǵymdaǵy jyly aýyl sharýashylyǵy taýarlaryn tutynýshylarǵa tikeleı satýdy qamtamasyz etý úshin ákimdikter 3890 aýyl sharýashylyǵy jármeńkelerin ótkizgen, onda naryqtyq baǵadan 10-15 paıyzǵa tómen deńgeıde jalpy somasy 9,8 mlrd. teńgege azyq-túlik taýarlary satylǵan. Budan bólek, azyq-túlik naryǵynda baǵa jaǵdaıyn turaqtandyrý boıynsha 9703 memorandýmǵa qol qoıylǵan, buǵan deıin qabyldanǵan memorandýmdy oryndaý boıynsha da monıtorıng júzege asyrylýda.
«Janar-jaǵarmaı, azyq-túlik, dári-dármek baǵasynyń kóterilýine baılanysty monopolııaǵa qarsy den qoıý sharalary aıasynda, 75 zertteý jasaldy. 20 qarashadaǵy jaǵdaı boıynsha 14 zertteý aıaqtalyp, Almaty, Aqmola, Aqtóbe, Soltústik Qazaqstan, Pavlodar, Batys Qazaqstan, Ońtústik Qazaqstan, Jambyl, Qyzylorda oblystary boıynsha 104 sýbektige qatysty tergeý aıaqtaldy. Olardyń ishinde bólshek saýdadaǵy iri janarmaı satýshylary da bar. Bul rette zańsyz paıda tabý boıynsha salynǵan jalpy aıyppul somasy 220 mln. teńgeden asady. Osylaısha, negizsiz baǵa ósimine jol bermeý jónindegi jumystar jalǵasýdy jáne bul udaıy baqylaýda tur», - dedi E. Dosaev.
