Negizgi zańda tabysty damýdyń barlyq quqyqtyq tetikteri qamtylǵan - Prezıdent

ASTANA. QazAqparat - Ata Zańda tabysty damýdyń barlyq quqyqtyq tetikteri qamtylǵan. Bul týraly búgin Astanadaǵy Táýelsizdik saraıynda Qazaqstan Respýblıkasy Ata Zańynyń 20 jyldyǵyna arnalǵan «Konstıtýtsııa: birlik, turaqtylyq, órkendeý» taqyrybyndaǵy halyqaralyq ǵylymı-tájirıbelik konferentsııada Elbasy Nursultan Nazarbaev málim etti.

«Bizdiń Konstıtýtsııadaǵy qaǵıdalardy ustana otyryp, eki onjyldyqtyń aıasynda ǵana uly joldy eńserip óttik. Búginde Qazaqstan qalyptasqan, órkenıetti memleket. Bul bizdiń Ata Zańdaǵy barsha qaǵıdalar men ustanymdardyń is júzinde naqty júzege asyrýynyń kórinisi. Memlekettik jáne qoǵamdyq qurylys jaqsyǵa qaraı ózgerýge qaýqarly bolsa ǵana tıimdi bolady. Bizdiń Negizgi zańda tabysty damýdyń barlyq quqyqtyq tetikteri qamtylǵan»,-dedi Prezıdent.

Elbasy ǵasyrdyń ortasyna qaraı Qazaqstandy álemniń eń damyǵan elderiniń birine aınaldyrý baǵytynda jahandyq maqsat qoıylǵanyn, bul turǵyda strategııalyq baǵdarlamalar daıarlanǵanyn atap ótti.

Osy oraıda N. Nazarbaev kóshbasshy barlyq elderde tabystylyqtyń eki quramdas bóligi bar ekenin, birinshisi qarqyndy ekonomıka men jańartý ekenin, al ekinshisi turaqty konstıtýtsııalyq júıe men turaqty memleket ekenin qadap aıtty. "Osy eki faktor HHІ ǵasyrda Qazaqstanǵa tolyqtaı qajet".