Negizgi kókónistermen ishki naryqty tolyq qamtyp otyrmyz – Erbol Qarashókeev

ASTANA. QazAqparat – Kókónis baǵasynyń maýsymdyq qymbattaýyn boldyrmaý úshin saqtaý qoımalaryn kúsheıtý qajet. Bul týraly QR Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat tilshisi.

«Kókónisterdiń negizgi túrleri boıynsha ishki naryqtyń qajettilikterin tolyq qamtamasyz etemiz. Máselen, 2022 jyly 4,1 mln tonna kartop, 621 myń tonna sábiz, 1,1 mln tonna pııaz jáne 551 myń tonna qyryqqabat óndirildi», - dedi E. Qarashókeev Úkimettiń búgingi otyrysynda.

Jemis-kókónis ónimderin óndirýdiń edáýir kólemine qaramastan, qys-kóktem kezeńinde saqtaý qýatynyń jetispeýinen naryqta otandyq kókónister usynysynyń tómendeýi baıqalady.

Bul naryqta ımporttyq ónimniń ósýine jáne maýsymaralyq kezeńde baǵanyń ósýine ákeledi.

«Atalǵan máseleniń sheshimi kókónisterdi saqtaý qýatyn arttyrý bolyp otyr. Ol otandyq ónimniń bir bóligin maýsymaralyq kezeńde saqtaýǵa jáne satýǵa múmkindik beredi. Qazir respýblıka boıynsha jalpy saqtaý syıymdylyǵy 1 952,8 myń tonna bolatyn 1 208 kókónis qoımasy, onyń ishinde 770 kókónis qoımasy, 382 kartop qoımasy jáne 55 jemis-jıdek qoımasy bar», - dedi Aýyl sharýashylyǵy mınıstri.

Buǵan deıin E. Qarashókeev Qazaqstanda sút óndirisin damytý úshin shıkizat bazasy álsiz ekenin aıtqan edi.