Negizgi kapıtalǵa salynǵan ınvestıtsııanyń ósý qarqyny qandaı

NUR-SULTAN. QazAqparat – Negizgi kapıtalǵa salynǵan ınvestıtsııalardyń ósý qarqyny 18,3 paıyzdy qurady. Bul týraly Úkimet otyrysynda bıylǵy jeti aıdaǵy áleýmettik-ekonomıkalyq damýdy talqylaý kezinde Ulttyq ekonomıka mınıstri Áset Erǵalıev málim etti, dep habarlaıdy QazAqparat tilshisi.

«Ekonomıkalyq ósýdiń mańyzdy faktory ishki jáne syrtqy ınvestıtsııalardy tartý bolyp otyr. Onyń ishinde óndirýshi emes salalarda ınvestıtsııa tartý belsendiligi baıqalýda. Osyǵan baılanysty, esepti kezeńde taý-ken óndirý ónerkásibin esepke almaǵanda, negizgi kapıtalǵa ınvestıtsııalardyń ósý qarqyny 18,3%-dy qurady», - dedi Á. Erǵalıev.

Onyń aıtýynsha, ınvestıtsııa qurylys salasynda – 2,3 esege, óńdeý ónerkásibinde – 83%-ǵa, aqparat jáne baılanysta – 48%-ǵa, aýyl sharýashylyǵynda – 46%-ǵa, saýdada – 40%-ǵa, jyljymaıtyn múlikpen operatsııalar 16%-ǵa jáne kólikte – 8,3%-ǵa ósti.

«Óńirler arasynda eń joǵarǵy kórsetkish Túrkistan jáne Soltústik Qazaqstan oblystarynda, sondaı-aq Shymkent jáne Almaty qalalarynda baıqalýda», - dedi mınıstr.

Budan buryn habarlanǵandaı, osy jyldyń qańtar-shilde aılarynda Qazaqstan ekonomıkasynyń ósý qarqyny 2,7 paıyzdy qurady.