Negizgi azyq-túlik túrleri tolyqtaı Qazaqstan aýmaǵynda óndiriledi
ASTANA. QazAqparat - Búgin Senattyń jalpy otyrysynda QR Premer-Mınıstriniń orynbasary - Aýyl sharýashylyǵy mınıstri Ómirzaq Shókeev aldaǵy jyldary Qazaqstan ımporttalatyn aýyl sharýashylyǵy ónimderinen arylatynyn aıtty, dep habarlaıdy QazAqparat.
2017 jyly óńdelgen aýylsharýashylyq ónimderi turǵysynda ımporttyń kólemi óskenine toqtalǵan ol: «Biraq eksport ta artty, jalpy syrtqy taýar aınalymy 14 paıyzǵa joǵarylap otyr. Endi bizdiń ishki naryq tolyǵymen ımportqa táýeldi dep aıtqan qısynsyz. Óıtkeni 30 eń mańyzdy azyq-túlik túriniń 25-i boıynsha ózimizdi qamtamasyz etýdemiz. Bıdaı, un, maıly daqyldar, sondaı-aq ettiń túrleri sııaqty negizgi taǵamdar boıynsha suranystan birneshe ese artyq óndiriledi», - dedi.
Onyń sózine qaraǵanda, 5 pozıtsııa boıynsha, ıaǵnı qant, shujyqtar, qus eti jáne jemis-jıdek sekildi ónimder aıasynda ımport 50 paıyzǵa deıin jetedi.
«Sondyqtan da bıyl memlekettik baǵdarlamaǵa ózgerister engizýdemiz. Sonyń ishinde et ónimderin eksporttaý, shetelge saýdalanatyn astyq ónimderiniń tizbesin keńeıtý sharalary eskerilgen. Budan bólek, ımportty almastyrý baǵytynda qus etiniń kólemin kóbeıtý boıynsha úlken óndirister iske qosylýda. Osy oraıda Bulandy aýdanynda (Aqmola oblysy) 60 myń tonna qus etin óndiretin zaýyttyń qurylysy aıaqtalýǵa jaqyn. Qyzylshadan qant shyǵaratyn óndirister sany artatyn bolady. Jalpy, baǵdarlama aıasyndaǵy josparlar iske assa, ımportqa qatysty máseleler sheshimin tabady», - dep túıdi Ómirzaq Shókeev.
