Negizgi astyq ósiretin oblystarǵa ǵylymı qoldaý jasaıtyn JOO bekitildi

ASTANA. QazAqparat - Elimizdiń soltústiginde negizgi astyq ósiretin oblystarda agroónerkásip keshenin tsıfrlandyrý jumystary S.Seıfýllın atyndaǵy Qazaq agrotehnıkalyq ýnıversıteti arqyly iske asyrylady. Bul týraly osy oqý ornynyń rektory Aqylbek Kúrishbaev málim etti, dep habarlaıdy QazAqparat.

«Elbasy óziniń Joldaýynda aldymyzǵa úlken maqsat qoıdy. Bes jyldyń ishinde aýyl sharýashylyǵy salasynda eńbek ónimdiligi 2,5 ese ósýi kerek. Árıne, ol úshin sońǵy býyndy tehnologııalardy qoldanýymyz qajet. Mınıstrliktiń sheshimimen bizdiń ýnıversıtetimiz jaqynda barsha soltústik óńir aýmaǵynda «aqyldy» tehnologııalardyń negizgi ǵylymı ortalyǵy bolyp bekitildi. Endi osy úlken jumysty bastaýǵa kiriskeli otyrmyz», - dedi rektor.

Onyń sózine qaraǵanda, oqý ornynyń jospary boıynsha árbir oblysta eki úlken bazalyq sharýashylyqtar aıqyndalady. Osy oraıda bul sharýashylyqtarda qanatqaqty rejimde «aqyldy» tehnologııalar engizilmek.

«Bul sharýashylyqtardaǵy tájirıbeni kórip, úlgi retinde basqa sharýashylyqtar ózderin jetildirýge tyrysady dep oılaımyz. Atap aıtqanda, iriktelgen sharýashylyqtar bizdiń ýnıversıtettiń kómegimen tyń jańalyqtar men tehnologııalardyń ortalyǵy bolady dep aıta alamyz», - Aqylbek Kúrishbaev.

Aıta keteıik, búgin atalǵan ýnıversıtette Aqmola oblysynyń ákimi Málik Myrzalınniń, QR Aýyl sharýashylyǵy mınıstrliginiń jaýapty hatshysy Ermek Kósherbaevtyń qatysýymen birlesken keńes ótip jatyr. Jıyn barysynda oblys aýmaǵynda eńbek ónimdiligin arttyrýǵa qatysty usynystar talqylanýda.