Nege eldegi demalys arzan emes – vıtse-mınıstr jaýaby

ASTANA. KAZINFORM – Týrızm jáne sport vıtse-mınıstri Erjan Erkinbaev Qazaqstandaǵy demalystyń qymbattyǵyn básekeniń joqtyǵymen baılanystyryp otyr. 

— «Nege Qazaqstandaǵy demalys sheteldegiden qymbatqa túsedi? Nege qyzmet kórsetý deńgeıi halyqaralyq standarttarǵa saı emes?», degen suraqtar jıi qoıylady. Bizde básekelestik bolmaıynsha, ózi az ǵana qonaq úı ıeleri suranys joǵarylaǵanda baǵany sharyqtatyp, qyzmet kórsetý sapasyna mán bermeıdi, óıtkeni klıent báribir keledi. Bizge básekeli orta qajet. Mysaly, Shymbulaq jalǵyz bolsa — abonement 15 myń teńge turady. Mańǵystaýdaǵy jyly jaǵajaıda Rixos jalǵyz bolsa — árqashan adam toly ári qymbat bolady. Býrabaıdaǵy Rixos ta óz salasynda jalǵyz bolsa — árdaıym qymbat ári suranysta bolyp qala beredi. Sondyqtan, bizge ártúrli deńgeıdegi kóptegen qonaq úı qajet, − dedi Erjan Erkinbekov Úkimette ótken baspasóz máslıhatynda.

Vıtse-mınıstr bul baǵyttaǵy eń durys qadam — jeńildetilgen nesıeleý ekenin aıtyp otyr. Osylaısha, naryqta bıznes sýbektileri kóbeıip, qoljetimdi ári sapaly jańa qonaq úıler paıda bolady. Al tutynýshylar nashar qyzmet kórsetetin qonaq úıdi emes, basqasyn tańdaı alady.

− Endi qarapaıym halyqqa qoljetimdi ınfraqurylym salýǵa nazar aýdaramyz. Sondyqtan budan bylaı ádettegi sanatorııler men úsh juldyzdy jaıly qonaq úılerge kóbirek kóńil bólemiz. Al bes juldyzdy lıýks qonaq úıler qajet bolsa, onymen bıznes aınalysýy kerek, − dedi Erjan Erkinbekov.

Aıta keteıik, sońǵy 5 jylda Qazaqstandaǵy týrıster sany 7,5 ese ósti. Byltyr elimizge 15 mln-nan astam adam saıahattap kelgen.

«Astana Kontsert» kompanııasynyń prodıýseri Málik Hasenov amerıkalyq aktrısa jáne ánshi Djennıfer Lopestiń Astanada ótetin kontsertinen qansha ekonomıkalyq paıda túsetinin aıtty.