NEF Qazaqstan basshysy Taryk Volkan Oskaı Qazaqstanǵa qashan ekstradıtsııalanady

ALMATY. KAZINFORM — Almaty prokýratýrasy NEF Qazaqstan basqarýshy seriktesi Taryk Volkan Oskaıdyń Chernogorııada ustalǵanyn resmı túrde rastady.

— Іzdeýde júrgen Oskay Tarik Volkan Qazaqstan Respýblıkasynyń aýmaǵynda emes, sebebi ony 9 maýsym kúni Chernogorııa Respýblıkasynyń quzyrly organdary ustaǵan, — dep habarlady Almaty prokýrorynyń birinshi orynbasary N. Rakıshev.

Qazaqstandyq tarap Chernogorııanyń quzyrly organdaryna ony ekstradıtsııalaý týraly ótinish jibergeni belgili boldy.

— 25 maýsymda QR Bas prokýratýrasy Chernogorııa Respýblıkasynyń Ádilet mınıstrligine Oskay Tarik Volkan-dy qylmystyq jaýapkershilikke tartý úshin Qazaqstan Respýblıkasynyń quzyrly organdaryna berý jóninde ótinish joldady. Qazirgi tańda Chernogorııanyń quzyrly organdary bul ótinishti qarap jatyr. Qaraý nátıjesi boıynsha tıisti sheshim qabyldanady, — delingen Almaty prokýratýrasynyń resmı jaýabynda.

Eske salaıyq, buǵan deıin QR ІІM NEF Qazaqstan basqarýshy seriktesi, izdeýde bolǵan Taryk Volkan Oskaıdyń ustalǵanyn resmı túrde rastaǵan edi.

2022 jyly Astana International Exchange (AIX) alańy NEF Qazaqstan kompanııasynyń 6 mlrd teńge kóleminde alǵashqy oblıgatsııalaryn ornalastyrǵanyn málimdegen edi. Alaıda 2023 jyly kompanııa AIX platformasynda alǵash ret defoltqa jol berdi — ol 4 mlrd teńgeden asatyn negizgi qaryzdy, sondaı-aq 402 mln teńge kólemindegi kýpondyq tólemdi óteý boıynsha óz mindettemelerin oryndaı almaǵan.

Bıyl kóktemde Almaty polıtsııasy 51 jastaǵy NEF Qazaqstan basqarýshy seriktesine — Túrkııanyń iri qurylys holdıngi NEF-tiń qazaqstandyq ókildigine qatysty alaıaqtyq faktisi boıynsha qylmystyq isti tergep jatqanyn habarlaǵan edi.