NEET sanatyndaǵy jastar kóp óńirler anyqtaldy

ASTANA. QazAqparat – Jastardy jumyspen qamtýdyń jańa tásilderi men mehanızmderin engizýge erekshe nazar aýdarý kerek. Bul týraly Úkimet otyrysynda QR Premer-Mınıstri Álıhan Smaıylov aıtty, dep habarlaıdy QazAqparat tilshisi.

«Jastardy jumyspen qamtýdyń jańa tásilderi men mehanızmderin engizýge erekshe nazar aýdarý kerek. Jyl saıyn eńbek naryǵyna 300 myńnan astam jastar shyǵady. Olardyń jumys tájirıbesi joq. Sondyqtan jastarǵa birinshi kezekte jumysqa ornalasýǵa kómektesý kerek», - dedi Álıhan Smaıylov.

Úkimet basshysy birinshi jartyjyldyqtyń qorytyndysy boıynsha NEET sanatyndaǵy jastardyń sany Ulytaý, Shyǵys Qazaqstan, Qaraǵandy, Qyzylorda, Jambyl jáne Almaty oblystarynda kóp ekendigine nazar aýdartty.

«Al, bul óńirlerde mamandarǵa suranys kóp. Atalǵan oblystardyń ákimdikteri jastardy oqytyp, jumysqa ornalastyrý máselesin jeke baqylaýǵa alsyn», - dedi Úkimet basshysy.