Nebári 3 jastaǵy bosqyn sábıdiń ólimi Eýropany dúr silkindirdi
ASTANA. QazAqparat - Otbasymen birge Grekııaǵa qashpaq bolǵan kezinde sýǵa batyp ketken sırııalyq sábıdiń fotosy eýropalyq iri basylymdardyń birinshi betinde jarııalandy.
Reuters agenttiginiń fotografy Nılýfer Demır túriktiń Bodrým qalasyna jaqyn jaǵajaıda jansyz jatqan úsh jastaǵy Aılan Kýrdıdi túsirgen. Bul jantúrshigerlik oqıǵa Eýrodaqtaǵy kóshi-qon problemasy jaıly pikirtalasty odan ári órshitti.
Búldirshin áke-sheshesimen, birneshe ondaǵan sırııalyq bosqyndarmen birge grekııalyq Kos aralyna jetpek bolǵan. Biraq qaıyq aýdarylyp, saldarynan 11-den astam adam, ishinde Aılan, onyń bes jastaǵy aǵasy Galıp jáne anasy ajal qushqan.
Jaǵada jatqan balanyń sýreti eýropa elderiniń bılik basyndaǵylardan óz elindegi azamattyq soǵystan qashqan sırııalyqtarǵa kópten beri kómek kórsetýdi talap etip kele jatqan belsendiler men quqyq qorǵaýshylardyń ashý-yzasyn týǵyzdy.
Brıtandyq The Independent gazeti 2 qyrkúıektegi redaktsııalyq materıalynda osy túsirilimdi birinshi betinde jarııalap, bosqyndarǵa tıisti kómek kórsetý sharalaryn talap etken.
«Eger osy sumdyq fotografııa, jaǵalaýǵa shyǵyp qalǵan sırııalyq balanyń ólimi Eýropanyń bosqyndarǵa degen qatynasyn ózgertpese, basqa ne ózgerte alýy múmkin?» degen saýal tastaıdy maqala avtorlary.
