Neapol mańyndaǵy janartaýlyq aımaqta sońǵy jyldardaǵy eń kúshti jer silkinisi boldy
ASTANA. KAZINFORM – Italııanyń ońtústigindegi Neapol qalasyna jaqyn ornalasqan Flegreı alańdary janartaýlyq aımaǵynda magnıtýdasy 4,7 bolatyn jer silkinisi bolyp, tórt adam jaraqat aldy. Tabıǵı apat saldarynan turǵyn úıler men shirkeýlerge zaqym keldi, dep habarlaıdy Euronews.
Italııanyń Ulttyq geofızıka jáne výlkanologııa ınstıtýtynyń (INGV) málimetinshe, negizgi jer silkinisinen keıin magnıtýdasy ártúrli 10 aftershok tirkelgen.
Mamandardyń aıtýynsha, juma kúngi jer silkinisi sońǵy jyldary seısmıkalyq belsendiligi kúsheıgen Neapoldiń batysyndaǵy Flegreı alańdarynda tirkelgen eń kúshti dúmpý boldy. Jer silkinisi Neapol qalasy men oǵan kórshiles eldi mekenderde de sezildi.
Italııanyń Azamattyq qorǵanys mınıstri Nello Mýzýmechıdiń aıtýynsha, tórt adam jaraqat alǵan. Sondaı-aq turǵyn úıler men birneshe shirkeýge zaqym kelgen.
Azamattyq qorǵanys departamenti tótenshe jaǵdaılar jónindegi daǵdarys shtabyn iske qosty. Qazirgi ýaqytta qutqarý qyzmetteri jer silkinisiniń saldaryn baǵalap jatyr.
Qaýipsizdik tekserýlerine baılanysty Neapoldi Flegreı alańdary mańyndaǵy eldi mekendermen baılanystyratyn Cumana jáne Circumflegrea temirjol jelilerinde poıyz qozǵalysy ýaqytsha toqtatyldy.
Jergilikti bılik turǵyndardy sabyr saqtap, resmı organdardyń nusqaýlaryn oryndaýǵa shaqyrdy.
Jer silkinisinen keıin kóptegen turǵyn qaýipsizdik úshin kóshege shyqty. Neapol qalasynyń keıbir aýdandary men oǵan jaqyn aýmaqtarda elektr qýatynyń úzilýi tirkeldi.
Eske sala ketsek, buǵan deıin 29 shilde kúni Japonııadaǵy jer silkinisi bolyp 3 adam qaza taýyp, 19 adam iz-túzsiz joǵalǵanyn jazdyq.
Keıinnen jer silkinisinen qaza tapqandar sany 35 adamǵa jetti.
Al keshe Prezıdent Qasym-Jomart Toqaev Japonııa Premer-mınıstrine kóńil aıtý jedelhatyn joldady.
