Neapolde bes qabatty úı qulady, úıindi astynda qalyp qoıǵan adamdar bar
ASTANA. QazAqparat - Neapolge taıaý ornalasqan Torre-Annýntsıata qalasynda juma kúni tańerteń ǵımarattyń jartysy qulap qaldy.
Qutqarýshylardyń aıtýynsha, qazirgi ýaqytta bes qabatty úıde turatyn eki otbasynyń taǵdyry beımálim, dep habarlaıdy Bı-bı-sı.
BAQ málimetinshe, úıindi astynda segiz adamǵa deıin qalýy múmkin.
Apatty jaǵdaıdyń sebebi ázirge belgisiz. Tek ǵımaratta jóndeý jumystary júrgizilip jatqandyǵy anyqtalyp otyr.
ANSA aqparattyq agenttigi kýágerler jaýabyn aldy: olardyń aıtýynsha, úıde jarylys bolmaǵan, alaıda, apatqa ushyrar aldynda úı janyndaǵy temirjolmen júk poıyzy ótken. Qazir bul joldarda qurylys bólshekteri shashylyp jatyr.
Oqıǵa ornynan túsirilgen sýretterde ǵımarattyń bir qabyrǵasy tutas qulap qalǵandyǵy kórsetilgen, ǵımarat ishin shań, beton jáne armatýra bólshekteri basqan.
