Ne sebepti koronavırýspen aýyrǵan medqyzmetkerlerdiń bári ótemaqy almaıdy – mınıstrlik jaýaby
NUR-SULTAN. QazAqparat - Antikor.Live baǵdarlamasynda Qazaqstan Respýblıkasy Eńbek jáne halyqty áleýmettik qorǵaý vıtse-mınıstri Erbol Ospanov ne sebepti koronavırýspen aýyrǵan medıtsına qyzmetkerleriniń bári ótemaqy almaıtyny týraly aıtty, dep habarlaıdy QazAqparat tilshisi.
QR Eńbek jáne halyqty áleýmettik qorǵaý vıtse-mınıstriniń aıtýynsha, koronavırýspen aýyrǵan 800-den astam dáriger men medıtsınalyq qyzmetker 2 mıllıon teńge kóleminde ótemaqy alǵan. Koronavırýs saldarynan qaıtys bolǵan medıtsına qyzmetkerleriniń otbasylaryna 10 mıllıon teńge tólengen úsh jaǵdaı boldy.
«Ótemaqy alý týraly ótinishter óte kóp. Basty másele – densaýlyq saqtaý basqarmasy deńgeıindegi komıssııa elektrondy júıege ótinish bergen kezde banktik derektemelerdi qate kórsetedi. Eńbek mınıstrliginiń júıesi derektemeniń durys-burystyǵyn, banktik esepshotty tekserip, bir san jetpeı tursa nemese derekteme durys bolmaǵan jaǵdaıda ótinishti keri qaıtarady. Derekteme durys bolmasa aqsha qaıda túsedi?», - deıdi QR Eńbek jáne halyqty áleýmettik qorǵaý vıtse-mınıstri Erbol Ospanov.
Ol ótemaqy berilmeýdiń taǵy bir sebebi – dıagnozdyń qate qoıylýy ekenin aıtty.
«Olar ózderiniń COVID-19-ben aýyrǵanyn kórsetedi, al densaýlyq saqtaý mınıstrliginiń júıesi ol koronavırýspen aýyrmaǵandyǵyn kórsetedi. Tekserý kezinde anyqtalyp, ótinish qaıta qaraý úshin qaıtarylady. Densaýlyq saqtaý mınıstrligimen birlese otyryp bul jumysty bastaǵan alǵashqy kúnderi kóptegen másele týyndady. Olar muny qalaı tekserý kerektigin bilmeı, trenıngter ótkizilip, túsindirý jumystary júrgizildi. Qazirgi ýaqytta bul jumys áldeqaıda sapaly jasalýda, ótinish berýshiler sany da artyp keledi. Bul jaǵdaıdy kúndelikti baqylap otyrmyz», - deıdi ol.
Vıtse-mınıstr osy máselege qatysty jemqorlyq táýekeli bolýy múmkin be ekeni týraly jaýap berdi.
«Bul jaǵdaıda sybaılas jemqorlyqtyń bar-joǵyn anyqtaý qıyn. Meniń oıymsha, komıssııa nemese sol deńgeıde sheshim qabyldaıtyn adamdar ... muny adamdar tarapynan ketken qatelikter dep túsindirýge bolady. Olar tehnıkalyq turǵyda qatelesip ketýi múmkin. Biz koronavırýspen aýyrǵan medıtsınalyq qyzmetkerler kóp ekenin jáne olardyń barlyǵyna memleket belgilegen tıisti qarjylaı kómek qajet ekenin túsinemiz. Biz bul jumysty óziniń logıkalyq qorytyndysyna jetkizemiz», - deıdi Erbol Ospanov.
