Ne sebepti marketpleısterge qatysty shaǵymdar jıilep keledi
ASTANA. KAZINFORM – Sońǵy bir jylda marketpleıster arqyly saýda kólemi qalaı ózgerdi? Shaǵymdar sany artty ma? Retteý sharalaryn engizý josparlanyp otyr ma? Bul suraqtarǵa Saýda jáne ıntegratsııa mınıstrligi jaýap berdi.
- 2024 jyldyń qorytyndysy boıynsha elektrondy saýda naryǵynyń kólemi 3,2 trln teńgeni qurady, ósim +33% (+0,8 trln teńge) boldy. Onlaın-saýdanyń damýymen birge elektrondy saýda salasynda tutynýshylar quqyqtarynyń buzylý jaǵdaılary da artyp keledi. Osy salaǵa qatysty tutynýshylar shaǵymdarynyń úlesi jalpy aryzdar sanynyń shamamen 22 paıyzyn qurady, olardyń ishinde shamamen 2 paıyzy sheteldik marketpleısterge qatysty shaǵymdar. Shaǵymdardyń negizgi mazmuny – taýar jáne satýshy týraly aqparattyń bolmaýy, usynylǵan taýardyń sıpattamaǵa sáıkes kelmeýi, ınternet-saıttardyń taýardy jáne aqshany qaıtarýdan bas tartýy, sondaı-aq alaıaqtyq faktileriniń jıileýi, - delingen mınıstrliktiń Kazinform agenttigine bergen jaýabynda.
Atap aıtqanda, bul máseleler sheteldik marketpleıster (AliExpress, Alibaba, TEMU, 1688 jáne basqalary) men satýshylardyń zańdy túrde Qazaqstan Respýblıkasynyń aýmaǵynda ornalaspaǵandyǵynan týyndap otyr.
Sonymen qatar, Qazaqstanda elektrondy saýdanyń ashyqtyǵyn qamtamasyz etý jáne quqyqtyq bazany kúsheıtý maqsatynda kelesi negizgi baǵyttar boıynsha jumystar júzege asyrylyp jatyr:
1. Tutynýshylardyń quqyqtaryn qorǵaý salasynda tıisti zań jobasy ázirlendi, onda birqatar tyń ózgeris qarastyrylǵan.
Elektrondy saýda alańdarynda ishki erejeleri bolýy kerek jáne tutynýshylardyń quqyqtaryn qorǵaý baǵytynda zańnamanyń saqtalýyn qamtamasyz etýi úshin satýshylarmen sharttar jasasýy tıis. Bul erejeler taýar týraly shynaıy aqparatqa, kepildikterge, jetkizýge, qaıtarýǵa jáne ónimniń qaýipsizdigine qoıylatyn talaptardy qamtıdy.
Bul alańdar ótinishterdi qabyldaý servısin qamtamasyz etip, saýda talaptary buzylǵan jaǵdaıda satýshylarǵa qatysty sharalar qoldanýy tıis.
Sonymen qatar, osy platformalar saýda men jarnama týraly derekterdi bir jyl boıy saqtaýǵa jáne tehnıkalyq aqaýlar týraly paıdalanýshylardy habardar etýge mindetti. Túzetýler paketi Parlament Májilisinde birinshi oqylymnan ótti.
2. Qabyldanǵan jańa Salyq kodeksi aıasynda kelesi sharalar kózdelgen:
– halyqaralyq marketpleıster boıynsha elektrondy saýdamen aınalysatyn sheteldik kompanııalardyń tirkelýi jáne salyqtardy tóleý jónindegi mindettemelerin oryndaýyna qatysty qyzmettiń ashyqtyǵyn qamtamasyz etý sharalaryn kúsheıtý bóliginde túzetýler engizildi.
Salyq boıynsha mindettemeler oryndalmaǵan jaǵdaıda, ınternet-resýrsty buǵattaý týraly sheshim qabyldanady.
– ınternet-alańdardyń ıeleri satylǵan taýarlar, kórsetilgen qyzmetter jáne jeke adamdarǵa jasalǵan tólemder týraly málimetterdi memlekettik kirister organdaryna usyný qaǵıdalary bekitildi.
Aıta keteıik, Eýrazııalyq ekonomıkalyq komıssııa keńesi sheteldik marketpleısterden satyp alynyp, elektrondy saýdaǵa salynatyn taýarlardy ákelýdiń jańa tártibi men sharttaryn bekitti.
