Ne ózgerýi múmkin: Rıeltorlyq qyzmetti retteýge qatysty zań jobasy Quryltaıda qaralyp jatyr
ASTANA. KAZINFORM- Qazaqstan Respýblıkasynyń Quryltaıynda rıeltorlyq qyzmetti retteýge qatysty zań jobasy qaralyp jatyr. Bul týraly Saýda jáne ıntegratsııa mınıstrliginiń janyndaǵy Qoǵamdyq keńestiń otyrysynda aıtyldy.
QR Saýda jáne ıntegratsııa mınıstri Arman Shaqqalıevtiń qatysýymen ótken otyrysta rıeltorlyq qyzmetti retteý, tutynýshylardyń quqyqtaryn qorǵaý, adal básekelestikti qamtamasyz etý jáne zańnamany jetildirý máseleleri talqylandy.
Saýda jáne ıntegratsııa mınıstrliginiń málimetinshe, rıeltorlyq qyzmetti retteýge qatysty zańnamany jetildirý jumystary depýtattardyń bastamasymen júrgizilip jatyr. Osy baǵytta mınıstrlik rıeltorlyq qyzmetti, rıeltorlyq qyzmet kórsetý tártibin, lıtsenzııalaý jáne memlekettik baqylaý máselelerin retteýge baǵyttalǵan zańnamalyq bastamalar boıynsha Úkimettiń úsh oń qorytyndysyn aldy.
Tıisti zań jobalaryn qaraý barysynda Úkimet rıeltorlyq qyzmetti retteıtin jeke zań ázirleýdiń qajeti joq ekenin atap ótti. Sonymen birge osy saladaǵy quqyqtyq retteýdi jetildirip, rıeltorlyq qyzmet alatyn azamattardyń quqyqtaryn qorǵaýdy kúsheıtý qajet ekeni aıtyldy.
Qazir rıeltorlyq qyzmetti retteýge qatysty zań jobasy Qazaqstan Respýblıkasynyń Quryltaıynda qaralyp jatyr. Sonymen qatar rıeltorlyq qyzmet kórsetý salasyndaǵy kásibı standart ázirlenip, kelisý jumystary júrgizilip jatyr.
Kezdesýde rıeltorlyq qyzmet kórsetý naryǵyna qatysty máselelerge erekshe nazar aýdaryldy. Qoǵamdyq keńes múshesi Marlen Smaılov naryqtaǵy qyzmetti retteýdiń ashyq ári túsinikti bolýy, tutynýshylardyń quqyqtaryn qorǵaý jáne rıeltorlardyń jaýapkershiligin kúsheıtý qajet ekenin aıtty.
Saladaǵy ózekti máselelerdiń qatarynda rıeltorlardyń biryńǵaı memlekettik tiziliminiń jáne mindetti akkredıtteýdiń bolmaýy, qyzmet kórsetýge ortaq talaptardyń belgilenbeýi, baǵa qalyptastyrýdyń ashyq emestigi jáne tutynýshylardyń shaǵymdaryn qaraý tetikteriniń jetkilikti deńgeıde rettelmeýi atap ótildi.
PANA qaýymdastyǵynyń tóraǵasy Aset Aıtbaıdyń aıtýynsha, rıeltorlyq qyzmetti retteýdi jetildirý bastamasyn kásibı qaýymdastyq osydan eki jyl buryn kótergen. Onyń sózinshe, naryqtaǵy negizgi máselelerdiń biri – kásibı talaptarǵa saı kelmeıtin deldaldardyń kóp bolýy jáne alaıaqtyq jaǵdaılarynyń kezdesýi.
-Usynylyp otyrǵan barlyq ózgeristi Qoǵamdyq keńes múshelerimen qosymsha talqylaımyz. Quryltaı janyndaǵy jumys toby aıasynda rıeltorlyq qyzmetti retteýge qatysty máselelerdi jan-jaqty pysyqtaý jumysy jalǵasady, – dedi QR Saýda jáne ıntegratsııa mınıstri Arman Shaqqalıev.
Otyrystyń taǵy bir mańyzdy bóligi otandyq et óńdeý salasynyń básekege qabilettiligin arttyrý máselesine arnaldy. Qoǵamdyq keńes músheleri ımporttyq shujyq ónimderiniń sapasyna qatysty másele kóterip, naryqtaǵy ónimderge baqylaýdy kúsheıtýdi usyndy. Atap aıtqanda, saýda oryndarynan shujyq ónimderiniń úlgilerin turaqty túrde alyp, zerthanalyq tekserýden ótkizý usynyldy.
Sonymen qatar keńes músheleri naryqtaǵy keıbir taýarlardyń shyǵý tegine qatysty máseleni kóterdi. Olardyń aıtýynsha, tutynýshy keı jaǵdaıda ónimniń qaıda jáne kim óndirgenin, sondaı-aq onyń naryqqa qalaı kelgenin anyqtaı almaıdy.
-Sondyqtan taýarlardyń tsıfrlyq kartasynyń mańyzy zor. Qazir biz taýardyń qozǵalysyn naqty baqylaýǵa múmkindik beretin Ulttyq taýarlar katalogyn ázirleý boıynsha belsendi jumys júrgizip jatyrmyz. Bul júıe taýardyń qaıdan kelgenin jáne odan ári qaıda baǵyttalǵanyn qadaǵalaýǵa múmkindik beredi. Úkimet ekonomıkany kóleńkeden shyǵarý baǵytynda júıeli jumys júrgizip keledi. Bul keshendi ári ýaqytty qajet etetin protsess. Al mundaı úderisterdi tsıfrlandyrý taýar qozǵalysynyń ashyqtyǵyn arttyrýǵa múmkindik beredi, – dedi mınıstr.
Otyrys sońynda Qoǵamdyq keńes músheleri Ǵalym Qusaıynovtyń óz erkimen Keńes quramynan shyǵý týraly ótinishin biraýyzdan qoldady. Onyń ornyna Qoǵamdyq keńes quramyna Qasymova Dana Temirhanqyzy kirdi.
Osyǵan deıin rıeltorlar jańa erejege kóshetini týraly jazdyq.
