NCOC kompanııasynan 2,3 trln teńge óndirip alý úshin atqarýshylyq is qozǵaldy
ATYRAÝ. KAZINFORM — Qashaǵan ken ornyn ıgeretin NCOC kompanııasyna salynǵan 2,3 trln teńge kólemindegi ekologııalyq aıyppuldy májbúrlep óndirý úshin atqarýshylyq is qozǵaldy. Atyraý oblystyq ekologııa departamentiniń málimetinshe, is memlekettik sot oryndaýshylarynyń qaraýyna berilgen.
Atyraý oblysy boıynsha ekologııa departamentiniń basshysy Asqar Júsipovtyń aıtýynsha, ótken jyly NCOC kompanııasyna qatysty 7 ákimshilik is qozǵalǵan. Jalpy aıyppul kólemi 2,3 trln teńgeni quraıdy. Osy ister boıynsha barlyq sot otyrysy aıaqtalǵan.
— Departamenttiń barlyq is-áreketi zańdy dep tanyldy. Osy jyldyń birinshi jartyjyldyǵynda 7 ákimshilik istiń altaýy boıynsha jalpy kólemi 1,5 mlrd teńgeni quraıtyn aıyppul jergilikti bıýdjetke tústi, — dedi Asqar Júsipov.
Óńirdiń bas ekology Asqar Júsipovtyń málimetine súıensek, qalǵan bir is, ıaǵnı 2,3 trln teńge aıyppuldy óndirý úshin májbúrlep oryndaý týraly atqarýshylyq is qozǵaldy. Qazir bul is Ádilet departamentiniń memlekettik sot oryndaýshylarynyń qaraýynda.
— Atqarýshylyq qujatty oryndaý merzimi — 2 aı. 20 shildede Ádilet departamentine májbúrlep óndirýge joldandy. Departamenttiń sot oryndaýshylary atqarý paraǵy boıynsha atqarýshylyq is qozǵady. Mendegi aqpar boıynsha NCOC kompanııasynyń múlikterine tyıym salyndy, — dep pikir bildirdi Asqar Júsipov.
Eske salaıyq, kompanııa aıyppulmen kelispeıtinin málimdep, halyqaralyq tórelik rásimderge júginse, Qazaqstan tarapy sot sheshimi zańdy kúshine engenin jáne ony oryndaý mindetti ekenin atap ótti
Aıta keteıik, Qashaǵan iri munaı jobasyna qatysty 2,3 trln teńge (5,1 mlrd dollar shamasynda) kólemindegi talapty QR Ekologııa jáne tabıǵı resýrstar mınıstrligi 2023 jyly kúkirtti shamadan tys saqtaý faktileri boıynsha engizgen edi.
