NCOC Qazaqstan Úkimetiniń ekologııalyq aıyppulyn halyqaralyq tórelikte daýlaıtyndaryn rastady

ASTANA. KAZINFORM – Qashaǵan ken ornyn ıgerýshi NCOC kompanııasy Kazinform saýalyna joldaǵan jaýapta Qazaqstan Úkimetiniń ekologııalyq aıyppulyn halyqaralyq tórelikte daýlaıtyndaryn rastady.

 — NCOC kompanııasy men onyń halyqaralyq aktsıonerleri halyqaralyq ınvestıtsııalyq kelisimder boıynsha tórelik bastaý týraly ótinish bergenin rastaıdy. Kompanııanyń paıymdaýynsha, Respýblıka tarapynan kúkirtti saqtaýǵa baılanysty ruqsat talaptarynyń boljamdy buzylýyna baılanysty qabyldanǵan sharalar halyqaralyq ınvestıtsııalyq kelisimder boıynsha mindettemelerge sáıkes kelmeıdi. Atap aıtqanda, ınvestorlarǵa ádil jáne teń quqyqtyq rejım usyný mindettemesi buzyldy dep sanaıdy, — dep jazylǵan resmı málimette.

Kompanııa málimetinde NCOC bul máseleni Qazaqstan Úkimetimen kelissóz arqyly sheshýge talpynǵany, biraq nátıje bolmaǵany aıtylǵan.

NCOC kúkirtti basqarý jáne saqtaý baǵytyndaǵy jumysyn Qazaqstan Respýblıkasynyń zańnamasyna tolyq sáıkes júrgizgenin, kompanııada barlyq qajetti ruqsat qujaty bolǵanyn málimdeıdi.

— Máseleni kelissóz arqyly retteýge talpynystar jasalǵanymen, bul áreketter nátıje bermedi. Osyǵan baılanysty halyqaralyq aktsıonerler halyqaralyq kelisimderge sáıkes arbıtrajdyq is júrgizýdi bastaýǵa májbúr boldy, — delingen NCOC aqparatynda.

Aıta ketý kerek, Qazaqstan úkimetiniń munaı alpaýyttarymen sottasyp jatqanyna birneshe jyl boldy. 

Eske salsaq, 2023 jyly North Caspian Operating Company kompanııasyna júrgizilgen tekserý nátıjesinde kúkirttiń normadan tys, 1,02 mln tonna kóleminde saqtalǵany anyqtalǵan. Ruqsat etilgen 730 myń tonna kúkirttiń ornyna 1 mln 750 myń tonna kúkirt saqtalǵan.