NCOC Qazaqstan Úkimetimen aradaǵy daý-damaıǵa pikir bildirdi

ASTANA. KAZINFORM – NCOC (North Caspian Operating Company) Qazaqstan Úkimetimen aradaǵy tórelik daýǵa oraı pikir bildirdi.

«Qazaqstan Respýblıkasy men Soltústik Kaspıı boıynsha ónimdi bólý týraly kelisim boıynsha merdiger kompanııalar (KMG Kashagan B.V. enshiles ulttyq munaı kompanııasyn qospaǵanda) arasynda kelisimniń belgili bir erejelerin qoldanýǵa qatysty birqatar daýly másele bar. Ol tórelikke jáne kelisimge sáıkes sarapshylyq anyqtaýǵa jatady. Merdiger kompanııalar kelisimge, QR zańnamasyna sáıkes jáne standarttar men aldyńǵy qatarly tájirıbeni qoldana otyryp áreket ettik dep sanaıdy. Qaraýdyń qupııa sıpatyna baılanysty qosymsha pikir bildire almaımyz» delingen NCOC taratqan aqparatta. 

Buǵan deıin Bloomberg basylymy Qazaqstan Qashaǵan ken ornyn ıgerip jatqan halyqaralyq munaı alpaýyttaryna qarsy tórelik talap qoıý somasyn 150 mlrd dollarǵa (67,3 trln teńge) deıin arttyrǵanyn, shyǵyn boıynsha daýǵa qosymsha alynbaı qalǵan paıda úshin ótemaqy talap etkendigin jazǵan bolatyn.

Al keshe Energetıka mınıstrligi bul jaıt Qazaqstan Úkimeti men merdiger kompanııalar tórelik rásimder aıasynda sheshýge nıetti erekshe kommertsııalyq daý ekendigin málimegen edi.

Aıta keteıik, ótken jyldyń kókteminde Qazaqstan Úkimeti eldiń batysynda munaı-gaz ken oryndaryn ıgerip jatqan North Caspian Operating Company N.V. jáne Karachaganak Petroleum Operating BV operatorlaryn halyqaralyq sotqa berdi.

Memleket kompanııalardy tender tártibin buzdy, Qashaǵandaǵy merdiger mindettemesin tolyq oryndaǵan joq dep aıyptady.

Bloomberg agenttigi 5 sáýirde Qazaqstan bıligi seriktesteriniń Qashaǵan boıynsha 13 mlrd, Qarashyǵanaq boıynsha 3,5 mlrd dollar shyǵyndy ustap qalǵanyna narazy bolyp otyrǵanyn atap kórsetti.

Sol ýaqytta Energetıka mınıstri Almasadam Sátqalıev Qarashyǵanaq jáne Qashaǵan ken oryndarynyń operatorlaryna qarsy sotqa shaǵym berilgenin, ol Qazaqstan halqynyń múddesin qorǵaý maqsatynda túsirilgenin atap ótken edi.

«Soma — 3,5 mlrd dollar jáne 13 mlrd dollar», — dep túsindirgen bolatyn Almasadam Sátqalıev.