NCOC-qa berilgen nusqamanyń kúshin joıý, kompanııany jaýapkershilikten bosatpaıdy – Ekologııa mınıstrligi

ASTANA. KAZINFORM – Elimizdiń Ekologııa jáne tabıǵı resýrstar mınıstrligi Qashaǵan ken ornynyń operatory – North Caspian Operating Company N.V. (NCOC) kompanııasyna qatysty Atyraý oblysynyń ekologııa departamentiniń nusqamasyn joıý týraly sot sheshimine qatysty túsinik berdi. 

Astana qalasynyń ákimshilik ister jónindegi sot alqasy NCOC kompanııasynyń talap-aryzyn qanaǵattandyryp, qujatty ázirleý kezinde jiberilgen rásimniń buzylýyna baılanysty joıdy. Alaıda mınıstrliktiń málimetinshe, sot sheshimi kompanııany ekologııalyq zańnamany buzǵany úshin jaýapkershilikten bosatpaıdy.

— Sot departament qorytyndylarynyń máni boıynsha negizdiligin qaraǵan joq jáne baǵalamady. Kerisinshe, sot departamentke óz quqyqtyq ustanymyn eskere otyryp, ákimshilik rásimdi aıaqtaý mindetin júktedi, — delingen Ekologııa jáne tabıǵı resýrstar mınıstrliginiń túsindirme aqparatynda.

Qazir departament rásimdeý kezinde anyqtalǵan kemshilikterdi joıyp jatyr. Ákimshilik rásimdik-protsestik kodekstiń normasyna sáıkes, sot sheshimi barlyq satyda shaǵymdanýǵa jatady.

Osyǵan oraı mınıstrlik ekologııalyq zańnamanyń qaǵıdaty boıynsha aldyn alý, turaqty damý jáne «lastaýshy tóleıdi» prıntsıpi aıasyndaǵy áreket jalǵasatynyn habarlap otyr.

— Zańda kózdelgen, quqyq buzýshyny jaýapkershilikke tartýǵa jáne qorshaǵan ortany qorǵaý normalaryn saqtaýǵa baǵyttalǵan barlyq shara qoldanylady, — dep habarlaıdy vedomstvo.

Eske sala ketsek, 2023 jyly Qashaǵan operatory NCOC Ekologııa mınıstrligimen sottasyp jatqany týraly jazǵan edik. 

2024 jyly «Qashaǵannan» munaı óndiretin NCOC kompanııasy 12,4 mlrd teńge aıyppul tólegeni belgili boldy. 

Sondaı-aq NCOC Qazaqstan Úkimetimen aradaǵy daý-damaıǵa pikir bildirdi. 

Al bıyl sáýirde TShO, Kaspıı munaı, Mańǵystaýmunaıgaz jáne NCOC–ke qomaqty somada aıyppul salyndy.