NCOC-diń qoǵamdyq tyńdaýynda ekologtarǵa qysym kórsetildi — Aıdos Sarym
ASTANA. KAZINFORM – Májilis depýtaty Aıdos Sarym Premer-mınıstr Oljas Bektenov pen Bas prokýror Berik Asylovtyń atyna saýal joldap, munaı-gaz salasyndaǵy qoǵamdyq tyńdaýlardyń zańǵa sáıkestigin tekserýdi surady.
— Munaı-gaz salasyndaǵy qoǵamdyq tyńdaý protsedýralarynyń resmı, rásimdik sıpaty basym bolyp barady. Azamattyq qoǵam ókilderi men sarapshylardyń pikiri elenbeı, saldarynan narazylyq týyndap, áleýmettik shıelenistiń órshýine túrtki bolyp jatyr, — deıdi depýtat.
Aıtýynsha, qoǵam ókilderi depýtatqa osy másele boıynsha júgingen.
— Mysaly, Qashaǵan ken ornyn ıgerý jobasy boıynsha NCOC kompanııasy júrgizgen qoǵamdyq tyńdaý ekologtar men belsendilerdiń synyna ushyrady. Óıtkeni ol kezdesýde qoǵamǵa 2050 jylǵa deıingi kezeńdi qamtıtyn joba tanystyrylǵan. Al kompanııanyń jer qoınaýyn ıgerý týraly kelisimsharty 2043 jyly aıaqtalady.
2025 jyldyń shildesinde «Kalamkas-Khazar Operating» JShS-niń Kaspıden Fort-Shevchenko qalasyna ótetin keme ótkelin salý jobasyn tanystyrǵan qoǵamdyq tyńdaýda onlaın rejımde qatysýshylardan mıkrofondy alyp alǵan.
2025 jylǵy mamyr kúni NCOC kompanııasy Damba kentinde Kaspıı tabanyn tazartý jobasy boıynsha ótkizgen qoǵamdyq tyńdaýda ekologtarǵa qysym kórsetý faktileri tirkelip, hattamalar burmalanǵan, suraqtardyń bir bóligine jaýap berilmegen, — deıdi depýtat.
Aıdos Sarym Premer-mınıstrge osyndaı tyńdaýlardyń birnesheýin iriktep, tekserý júrgizýdi usyndy.
Osyǵan baılanysty sizden suraımyz:
— Keıingi úsh jyldaǵy negizgi munaı-gaz jobalary boıynsha ótken qoǵamdyq tyńdaýlardyń zańǵa sáıkestigine iriktep tekserý júrgizýdi suraımyz. Tekserý qorytyndysy ýákiletti organdardyń resmı aqparat júıesinde jarııalansyn. Ekologııalyq saraptamanyń táýelsizdigin nyǵaıtyp, protsedýra kezinde zań buzǵan uıymdardyń jaýapkershiligin kúsheıtý kerek, — dedi Májilis depýtaty.
Eske salsaq, Májilis depýtaty Temir Qyryqbaev kerisinshe ken qazýǵa ruqsat alý úshin jergilikti turǵyndarmen qoǵamdyq tyńdaý ótkizý talabyn Ekologııa kodeksinen alyp tastaýdy usynǵan bolatyn.