NCOC-dan 2,3 trln teńge óndirip alý isi ýaqytsha toqtatyldy
ATYRAÝ. KAZINFORM - NCOC kompanııasynan 2,3 trln teńge óndirip alý úshin qozǵalǵan atqarýshylyq is ýaqytsha toqtatyldy. Mundaı aqparat atqarýshylyq is júrgizý organdarynyń avtomattandyrylǵan aqparatty júıesinde belgili boldy.
Aqparattyq júıedegi málimetke súıensek, munaı-gaz kompanııasyna qatysty is 21 shilde kúni qozǵalǵan. Óıtkeni, «Nort Kaspıan Opereıtıng Kompanı» kompanııasy ózderine qatysty qomaqty aıyppulmen kelispeıtinin málimdep, halyqaralyq tórelik rásimderge júgingen edi.
Atqarýshylyq is 7 qyrkúıek kúni toqtatylǵan. Resmı organdar onyń naqty sebebin ataǵan joq.
Aldyn ala málimet boıynsha, boryshker esepteletin kompanııa atqarýshylyq is boıynsha memlekettik aıyptaýshynyń áreketine qatysty sotqa shaǵym jazǵan.
Qashaǵan iri munaı jobasyna qatysty 2,3 trln teńge (5,1 mlrd dollar shamasynda) kólemindegi talapty QR Ekologııa jáne tabıǵı resýrstar mınıstrligi 2023 jyly kúkirtti shamadan tys saqtaý faktileri boıynsha engizgen edi.
Buǵan deıin ekologııa departamentiniń basshysy Asqar Júsipov atqarýshylyq qujatty oryndaý merzimi 2 aı ekenin aıtty.
