NBC: Madýro men onyń jubaıy ushaqpen Nıý-Iork shtatyna jetkizildi
ASTANA. KAZINFORM — AQSh áskeri Venesýelaǵa basyp kirip, qolǵa túsirgen el prezıdenti Nıkolas Madýro men onyń jubaıy Sılııa Flores Nıý-Iork shtatyndaǵy áýejaıda ushaq bortynan túsirildi. Bul týraly NBC News telearnasy tikeleı efırde habarlady.
«Nıkolas Madýro men onyń jubaıy AQSh-qa jetkizildi. Birneshe sát buryn olar ushaq bortynan tústi», dedi telearna júrgizýshisi tikeleı efırde.
Translıatsııa kadrlarynan sur tústi kostıým kıgen er adamnyń trappen tómen túsip kele jatqanyn jáne ony kóptegen quqyq qorǵaý organdary qyzmetkerleri qorshap júrgenin kórýge bolady. Buǵan deıin AQSh prezıdenti Donald Tramp jarııalaǵan fotosýrette Nıkolas Madýro dál osyndaı kıimmen júrgen edi.
Aldyn ala habarlanǵandaı, jaqyn ýaqytta Madýro men onyń jubaıynyń saýsaq izderi alynyp, fotosýretteri túsiriledi. Birqatar amerıkalyq BAQ-tyń málimetinshe, olardyń sottaǵy alǵashqy tyńdalymy 5 qańtarda ótpek. Sol ýaqytqa deıin olar jospar boıynsha Brýklındegi ýaqytsha qamaý ızolıatorynda otyrmaq.
Eske sala ketsek, Venesýela prezıdenti jubaıymen birge ustalyp, elden evakýatsııalanǵanyn jazdyq.
Al keıinirek AQSh prezıdenti Donald Tramp Venesýela prezıdenti men onyń áıeli kememen Nıý-Iorkke jetkiziletinin málimdedi.