NBA juldyzdary daryndy qazaqstandyq balalardy izdep keldi
ALMATY. QazAqparat - NBA juldyzdary Vladımır Radmanovıch pen Tadj MakÝılıams-Franklın qazaqstandyq jas basketbolshylarǵa sheberlik sabaqtaryn ótkizý úshin Almatyǵa keldi, dep habarlaıdy «QazAqparat» HAA tilshisi.
Tórt jyl buryn Eýropa jáne Azııa elderinde bastalǵan basketbol baǵdarlamasy qazaqstandyq órenderge bolashaqta NBA parketterinde óner kórsetýine múmkindik beredi. NBA vıtse-prezıdenti Devıd Ýottstyń sózine qaraǵanda, Qazaqstan jasóspirimder lıgasy NBA-diń Ortalyq Azııadaǵy alǵashqy lıgasy bolady. Ol Astana men Almatyda ashylady. Árbir qaladan 30-dan komanda jasaqtaldy, onyń 15-i - uldar, 15-i - qyzdar komandasy. Lıga oıyndary jyl sońyna deıin ótedi, fınaldyq básekeler keler jyldyń kókteminde Astanada uıymdastyrylady.
Vladımır Radmanovıch pen Tadj MakÝılıams-Franklın - NBA-diń aıtýly juzdyrdary. Radmanovıch karerasyn Serbııada 1997 jyly bastady. Keıinnen amerıkanyń «Sıetl» klýbyna aýysty. Odan keıin «Los-Andjeles Leıkers», «Golden Steıt Ýorrıorz», «Atlanta» jáne «Chıkago Býllz» komandalarynyń quramynda óner kórsetti.
Tadj MakÝılıams-Franklın eki dúrkin WNBA chempıony atanǵan, alty ret WNBA All Star dodasyna qatysty, Ispanııa Ulttyq lıgasynyń chempıony, Koroleva kýbogynyń jeńimpazy, Reseı Ulttyq lıgasynyń chempıony, Polsha, Eýrolıga chempıony atanǵan. Ataqty basketbolshy qazir 47 jasta. Úsh buryn oıynshy retindegi kásibı mansabyn aıaqtaǵan ol qazirde Dallastaǵy Dallas Wings klýby bas bapkeriniń kómekshisi bolyp júr.
«Bul meniń Qazaqstanǵa alǵash ret kelýim. Almatynyń taýlary júregińdi jaýlap alady, Astananyń záýlim úıleri tamasha salynǵan. Maǵan Qazaqstan qatty unady. Qazaqstandyq balalardyń basketboldyń bıigine shyqqanyn qalaımyn», - deıdi ol.
Eske sala keteıik, Amerıkanyń Ulttyq basketbol qaýymdastyǵy (NBA) Qazaqstan Ulttyq basketbol federatsııasy jáne Qazaqstannyń AQSh-taǵy elshiligimen yntymaqtastyqta Qazaqstanda 2017-2018 jylǵy Junior NBA jasóspirimder basketbol lıgasyn ashqan bolatyn.
Foto: Gaýhar Mýkaman (Generalnoe Konsýlstvo SShA)
