NBA juldyzdary zańsyz oıyn bıznesine qatysy bar degen kúdikke ilikti

ASTANA. KAZINFORM – AQSh Federaldyq tergeý bıýrosy (FBR) zańsyz qumar oıyndary men sporttyq bás tigýlerge qatysty aýqymdy tergeý júrgizip, nátıjesinde NBA-nyń birneshe tanymal tulǵalary qamaýǵa alyndy, dep habarlaıdy BBC.

Tergeý aıasynda «Portlend Treıl Bleızers» bas bapkeri Chonsı Bıllaps pen «Maıamı Hıt» qorǵaýshysy Terrı Rozır ustaldy. Sondaı-aq burynǵy oıynshy ári jattyqtyrýshy Deımon Djons pen taǵy birneshe adam zańsyz oıyn uıymdastyrý men sporttyq nátıjelerge áser etý maqsatynda alaıaqtyq jasady degen kúdikke ilindi.

FBR dereginshe, Bıllaps mafııalyq qurylymdar uıymdastyrǵan jerasty poker oıyndaryna qatysqan, al Rozır men ózge oıynshylar bás tigý koeffıtsıentterin ózgertý úshin jaraqat alǵan keıip tanytqan.

Tergeý nátıjesinde 30-dan astam adam, sonyń ishinde «Koza nostra» sıtsılııalyq mafııasynyń músheleri tutqyndaldy.

FBR dırektory Kesh Pateldiń aıtýynsha, keltirilgen jalpy zalal ondaǵan mıllıon dollardy quraıdy.

– Bul Gollıvýd fılmin eske salatyn kúrdeli alaıaqtyq shemasy. Zardap shekkender Nıý-Iork, Maıamı jáne Las-Vegas qalalarynda tirkelgen, – dedi ol.

NBA basshylyǵy resmı málimdeme jasap, Terrı Rozır men Chonsı Bıllapstyń ýaqytsha jumystan shettetilgenin, al tergeý aıaqtalǵansha olardyń qatysýyna tyıym salynǵanyn habarlady.

Qazir ustalǵandar kepilmen bosatylǵan, olar ózderine taǵylǵan aıyptardy tolyǵymen joqqa shyǵaryp otyr.

Aıta keteıik, jyl basynan beri AQSh-ta 2000-nan asa meksıkalyq ustaldy.