NBA matchyna kelgen Golovkın men Djeıkobs jınalǵan jurttyń qoshemetine bólendi

ASTANA. QazAqparat - WBA (Super), IBO, WBC jáne IBF nusqalary boıynsha orta salmaqtaǵy álem chempıony qazaqstandyq Gennadıı Golovkın men onyń keleshek qarsylasy amerıkalyq Denıel Djeıkobs Nıý-Iorkte ótken NBA turaqty chempıonatynyń matchynda qurmetti qonaqtar boldy, dep habarlaıdy QazAqparat.

Buǵan deıin, 18 naýryz kúni ótetin Golovkın-Djeıkobs jekpe-jegin jarnamalaý boıynsha medıatýr aıasynda boksshylar birge Nıý-Iorkke keletini habarlanǵan bolatyn.

Olar Madison Square Garden arenasynda "Nıý-Iork Nıks" pen "Nıý-Orlean Pelıkans" arasynda ótken matchty tamashalady.

Oıyn arasyndaǵy úzilis barysynda parket ortasyna belgili konferanse Maıkl Baffer shyǵyp, Golovkın men Djeıkobstyń aldaǵy jekpe-jegi týraly aıtyp berdi. Al onyń basty keıipkerlerin tanystyra bergende trıbýnalarda otyrǵan qalyń jurt qyzý qol shapalaqtap, shýlaı jóneldi.

Aıta keteıik, Golovkın «Nıks» basketbolshysy 

Krıstaps Porzıngıspen kezdesip, kádesyılarmen almasty. Qazaqstandyq boksshy oıyn maıkasyn, al basketbolshy GGG qoltańbasy bar qolǵap aldy, dep habarlaıdy vesti.kz.

Eske salaıyq, Golovkın-Djeıkobs kezdesýi 2017 jyldyń 18 qańtary kúni Nıý-Iorktegi Madison Square Garden arenasynda ótedi. AQSh-ta jekpe-jekti HBO telearnasy PPV aqyly translıatsııalar júıesi arqyly kórsetedi. Boks keshin Qazaqstanda «KazSport» jáne «Qazaqstan» Ulttyq arnalary taratady.

34 jastaǵy Golovkın kásipqoı bokstaǵy óz mansabynda 36 kezdesýdi jeńispen aıaqtady, onyń 33-in - nokaýtpen. 29 jastaǵy Djeıkobstyń esebinde 32 jeńis (29 nokaýt) jáne 1 jeńilis bar.