Nazym Qyzaıbaıdyń aýyr balǵamen jattyǵýy áleýmettik jelige tarady
ASTANA. QazAqparat - Şýchede ótken bokstan TMD ashyq kýbogynyń jeńimpazy Nazym Qyzaıbaıdyń erekshe jattyǵyp jatqan vıdeosymen áleýmettik jelide Marat Iǵalı bólisti, dep habarlaıdy QazAqparat.
«Bokstan álemniń eki dúrkin chempıony jáne elimizdiń eń stıldi boksshysy Nazym Qyzaıbaıdyń jattyǵý sátti. Syrttaı názik kórinetin Nazym Býrabaıda, Şýchede ótken TMD ashyq kýbogynda jeńiske jetti. Qutty bolsyn! Týrnır jyl saıyn ótetin bolady jáne onyń basty maqsaty - Şýche-Býrabaı kýrortty aımaǵyna týrıster tartý», - dedi Aqmola oblysy ákiminiń keńesshisi Marat Iǵalı.
Aıta keterligi, atalǵan týrnırdiń aqtyq jekpe-jekteri 7 naýryz kúni ótken bolatyn. 51 keli salmaq sanatynda sharshy alańǵa kóterilgen Nazym Qyzaıbaı sońǵy kezdesýinde Jaına Shekerbekovadan basym tústi. Al úshinshi oryndy úndistandyq Samdjýbala Sardjetsaba men ýkraınalyq Tatıana Kob bólisti.
Jalpy bul týrnırde qazaq qyzdary 6 altyn medal ıelengen bolatyn.
foto:Danııar Maılybaev
