Nazym Qyzaıbaı: Juldyzym jarqyraıtyn kún áli alda

QazAqparat eki dúrkin álem chempıony atanǵan Nazym Qyzaıbaımen «Astana aqshamy» gazetinde jarııalanǵan suhbatty oqyrmandaryna usynady.

- Jeńisiń qutty bolsyn! Qazaq qyzdarynyń arasynda eki dúrkin álem chempıony atanǵan jalǵyz boıjetken ózińsiń. Bul jolǵy jeńistiń dámi bólek pe?

- Árıne. Qansha degenmen Otany­myzda, Qazaqstannyń tórinde uıymdastyrylyp jatqan soń, dodaǵa barymdy salýǵa tyrystym. Jankúıerlerdiń qoldap-qolpashtaǵany da boıyma erekshe rýh berdi. Qytaılyq qarsylasym ońaı shaǵylatyn jańǵaq emes. Alaıda men ony aldyn ala zerttep, sonyń nátıjesinde kúshti kóbirek qaıda jumsaý kerektigin túsindim. Ekinshi jaǵynan, ózge boksshylar sekildi oń ne sol qoldyń aıqyn basymdylyǵy mende joq. ıAǵnı, ekeýimen de birdeı judyryqtasa beremin. Menińshe, barlyq stıldi úırengende ǵana úlken jetistikke jetýge bolady.

- Bárekeldi! Áıtkenmen kez kelgen sportshynyń uly armany Olımpıada shyńyn baǵyndyrý ǵoı. Seni bıyl Rıoda kóremiz be dep úmittengenbiz. Ókinishke qaraı, salmaq kategorııań Olımpıada baǵdarlamasyna kirmeıdi. Úsh kelideı salmaq qosý qıynǵa soqty ma?

- Bári Allanyń qalaýymen. Juldyzym jarqyraıtyn kún áli alda. Buıyrsa, 2020 jyl meniń jylym bolady.

- Aýzyńa maı. Oǵan deıin de elimizde áıelder boksy qanat jaıyp, jańa esimder dúnıege keler. Bul sport túrine degen kózqaras ázirge shetelde myqtyraq bolyp tur. 

- Durys aıtasyz. Onda bir sportshynyń janynda birneshe adam erip júredi. Biri massajıst, biri dıetolog, biri dáriger degendeı... Eki jattyqtyrýshysy jáne bar. Mundaı jaǵdaıdan keıin olarǵa júlde almaýdyń ózi uıat qoı (kúlip). Bizde de, shúkir, jaǵdaı jaman emes. Qyzdar boksy Olımpıada baǵdarlamasyna engennen keıin bul sportqa qyzyǵatyn boıjetkender birshama kóbeıdi.

- Dúnıejúzilik jarystarǵa barǵanda, ádiletsizdikter jıi bolyp tura ma?

- Árıne. Kún men tún sekildi jeńis pen jeńilis alma-kezek aýysyp keledi. Jeńgende qalaı qýansań, jeńilistiń salmaǵyn dál solaı arqalaı bilýiń kerek. 2012 jylǵy álem chempıonatynyń jartylaı fınalynda úndi qyzy aldymdy orap ketken. Tórt raýnd boıy qarsylastym, álimniń jetkeninshe judyryqtastym. Sonda da jeńis qarsylasyma buıyrdy. Biraq ár sátsizdikke jası berseń, kózdegen maqsatyńa jete almaısyń ǵoı. Ondaılarǵa mán bermeýge tyrysamyn.

- Sporttyq karerańdy on jasyńda bastapsyń. Úıdegiler boksqa barýyńa qarsy bolmady ma?

- Balalyq shaǵym Almaty oblysyndaǵy Іle aýdanynyń Jetigen aýylynda ótti. Bir kúni sondaǵy mektepte boks úıirmesi ashyldy. Kishkentaı kezimnen sportqa jaqyn edim, dereý álgi úıirmege jazyldym. Aldymdaǵy aǵam, ápkem, inim, sińlimniń eshqaısysy sportqa áýes emes-tin. Meniń boksqa qatysatynymdy estigen soń, anam azdap qarsy boldy. Úlkender jaǵy «Qyz balasyń ǵoı, boksty qaıtesiń?» degen sııaqty aqyldaryn da aıtqan. Sportqa degen mahabbatym bárinen basym tústi me, eshkimdi tyńdamadym. Alǵashynda meniń salmaǵymda qyzdar bolmaǵan soń, ul balalarmen birge jattyǵyp júrdim. Solarmen judyryqtasatynmyn. Úsh aıdan keıin Almatydaǵy sport mektep-ınternatyna oqýǵa qabyldandym. Sol kezden beri Jumabek Ómirzaqov meniń bapkerim boldy.

- Boksty tańdaǵanyńa ókinetin kezder bola ma?

- Joq. Negizi bizdi sátsizdikter shyńdaıdy ǵoı. Biraq qatty taıaq jegen kezim bolǵan joq. Sportqa kelgeli bir ret qana murnym qanap, soqqy alyppyn.

- Qazir qyzdar quramasyn jattyqtyratyn bapkrler arasynda áıel bapkerler óte az. Óziń sporttyq karerańdy aıaqtaǵan soń, bapker bolǵyń kelmeı me?

- Álbette, bolǵym keledi. Qazirdiń ózinde bokstyń ózim biletin taktıkasyn sińlilerime úıretip júrmin.

- Otandyq boksshylardan kimderdi úlgi tutasyń. Sheteldikterden she?

- Bekzat Sattarhanovty úlgi tutamyn. Serik Sápıev, Gennadıı Golovkın, Marına Volnovalardyń sheberlikterine tántimin. Shetel boksshylarynan Floıd Meıvezer, Roı Djons, Mennı Pakıao unaıdy.

- Búginde jurtshylyqqa kádimgideı tanylyp qaldyń. Halyqtyń qurmet-qoshemeti «juldyz aýrýyna» shaldyqtyrmady ma?

- Men ondaı aýrýmen eshqashan aýyrmaıtyn shyǵarmyn (kúlip). Keıde jolshybaı meni kórip qalyp «Sen anaý boks­shy qyzǵa uqsaıdy ekensiń» dep aıtyp jatady. Ondaıda jymıyp «Men ǵoı sol» dep jaýap beremin. Kólik aıdap júrip jol erejesin buzǵanymda «Aǵaı, asyǵys edim. Jibere salyńyzshy» dep ótinish aıtqan kezderim bolǵan. Bıylǵy Qazaqstan chempıonatyna daıyndyq kezinde qurbym ekeýmizdi tártip saqshylary toqtatty. Bizdi kórip: «Oı, bul bizdiń sportshylar ǵoı! Myna qyz - Álem chempıony» dep janyndaǵylarǵa ábden maqtap, bizdi jibere salǵan. Osyndaı jaǵdaılarda tanymaldylyǵym kómektesedi.

- Seniń qolyńdaǵy tatýırovkany baıqap qaldyq. Qupııa bolmasa aıtshy, ol neni bildiredi?

- Tatýırovkamda qolǵap, Olımpıada sheńberleri jáne Týdaǵy qyran beınelengen. Bular - mendegi armandardyń sımvoly ispettes.

"Astana aqshamy" gazeti, 2016 jylǵy 14 maýsym