Nazym Qyzaıbaı: Astanadaǵy álemdik synda ataǵymdy qorǵaýǵa kúsh salamyn

Balalyq shaǵy týraly

Men aýylda, qarapaıym otbasynda dúnıege keldim. Biz otbasyda alty aǵaıyndymyz. Men úıdiń úshinshisimin. Men ómirge kelgende qyzyq oqıǵa bolypty. Ákem ul bala kútken eken. Biraq men dúnıege kelippin, soǵan ákem ul bolmady dep, úsh kún boıy ún qatpaı, renjip júrgen kórinedi. Bálkim, ákem ul bolǵanyn qatty qalaǵandyqtan ba eken, bala kezimnen uldarmen alysyp oınaıtynmyn. Ápkelerim men kishkentaı inime bireý tıisse solar úshin tóbelesetinmin. Kóbine uldarmen tóbelesýge týra keletin. Keıde adam jaratylysynan bir iske jaqyn bolady ǵoı. Men ata-anam qalaǵandaı ul bolmasam da, sportqa jaqyn boldym. Mektepte basketbol, fýtbol oınadym. Meniń bala kezde sportqa jaqyn ekenimdi baıqap, aýylda boks pen kúresti qatar úıretetin jalǵyz jattyqtyrýshy sportqa shaqyrdy. Birer aı ol kisiden boks álippesin úırendim. Keıin aǵam Almatyda osy qazir biz otyrǵan ınternattyń ashylǵanyn aıtty. Sosyn synaq tapsyryp tústim.

Internatta oqý týraly
Internetta bes aı oqyǵan soń, alǵashqy jarysqa qatystym. Ol jasóspirimder arasyndaǵy el birinshiligi bolatyn. Birinshi kezdesýim jeńisti boldy.

Birinshi jarysymda 44 keli salmaqta top jardym. Úsh kezdesý ótkizip, qarsylastarymnyń bárin aıqyn uttym. Sodan keıin bapkerim Jumabek aǵaı eresekter jarysyna qatysamyz dedi. Biraq ol kezde jasym on altyǵa tolmaǵan. Biraq, ol kedergi bolmady, jolym bolyp Qyzylordada ótken áıelder arasyndaǵy el chempıonatynda 46 kelide birinshi oryn aldym.

Álem chempıonaty týraly
Meniń sporttyq kareramdaǵy mańyzdy kezdesý ol Chedjý qalasynda ótken Álem chempıonaty. 48 keli salmaqta alańǵa shyǵyp, bes kezdesý ótkizdim. Aqtyq synǵa úndi boksshysymen shyqtym. Oǵan jasóspirimder arasyndaǵy álem chempıonatynda ese jibergenmin. Sol joly qarymta qaıtarý úshin barymdy saldym. Altynǵa da qol jetti.
Shyny kerek, elge oralǵansha jeńistiń tátti dámi qandaı bolatynyn sezinip úlgermedim. Tek ánuran shyrqalǵan sátte júregim ádettegiden jıirek soqty. Jeńistiń qýanyshyn tek Almatynyń áýejaıyna qonǵan sátte jankúıerlerimniń «Nazym, Nazym» dep aıǵaılaǵan daýysyn estigende baryp sezindim. Naǵyz jeńisti óz jerime kelgende ǵana sezine aldym. Jarystarmen kóp elderde boldym. Mysaly, Germanııanyń úıleri ertegidegideı, óte ádemi. Biraq qansha ádemi bolsa da, basqa elde ómir súrgim kelmeıdi. Men Qazaqstandy, Almatyny qatty jaqsy kóremin.

Álem chempıonatynan keıingi kezeń
Álem chempıonatynan keıin adamdar tanı bastady, telarnaǵa, gazet-jýrnaldarǵa suhbatqa, túrli saltanatty sharalarǵa shaqyra bastady. Aıtpaqshy, osy saltanatty sharalarǵa shaqyrýdyń arqasynda kıimderime uzyn kóılekter de qosyldy. Buryn kóbine sporttyq kıim kıetinmin.
8 naýryz qarsańynda Prezıdenttiń qabyldaýynda boldym. Sol joly birinshi ret birneshe saǵat bıik ókshe kıip júrdim. Barlyq iske jattyǵý kerek eken. Ózim úshin ashqan jańalyǵym: birneshe saǵat bıik ókshe kıgennen, jarysta judyryqtasý ońaı eken.

Rıngtegi sezimi týraly
Jalpy qorqynysh seziminiń bolýy zańdy. Eger rıngke shyqqanda qoryqpasam, qobaljı bastaımyn. Al eger kezdesýge deıin qorqynysh bolatyn bolsa, rıngte ózimdi senimdi ustaımyn.

Áıelder boksy týraly
Bárinen aýyry - búırek tusynan soqqy alý. Meni de kóbinse búıregimnen urýǵa tyrysady. Biraq aıap otyra almaısyń. Bul - sport.
Jarystarǵa ákem-anam, baýyrlarym qelmeıdi. Men qobaljymasyn dep oılaıdy. Ári men de týǵan-týystarym joq kezde rıngte ózimdi erkin sezinemin. Jarystan tys ýaqytta qolym qalt etse birden ata-anama, baýyrlaryma tartamyn.

Jaına Shekerbekova týraly
Rıngta qarsylaspyz. Al negizinen birge jattyǵý jasaımyz. Sportta qarsylastyq kerek. Qarsylas bolmasa sportshynyń ósip-jetilýi qıyn. Barlyq nárse óz qolymyzda. Kim kóp eńbek kórsetedi sonyń joly bolady. Aldaǵy Qazaqstan chempıonatynda kezdesemiz, sol kezde jeńiske jetemin dep oılaımyn.

Basty maqsaty týraly
Árbir sportshynyń basty armany - Olımpıada shyńyn baǵyndyrý. Bıyl ótetin tórtjyldyqtyń basty básekesinde barymdy salamyn. Ol úshin aldaǵy jarystarda olımpıada lıtsenzııasyn ıelenýim kerek. Bıyl Astanada ótetin álem chempıonatynda ataǵymdy qorǵaý da josparymda bar.

Sporttan tys
Qazir men Kaspi Bank-tiń «Kaspi qaharmandary» atty jarnamalyq naýqanyna qatysyp jatyrmyn. Bul naýqan 2014 jyldyń qyrkúıek aıynan bastalyp iske qosylty. Maqsaty eńbektiń arqasynda jetistikterge jetken qazaqstandyqtardy nasıhattaý. Buǵan deıin 7 ret rekordtar kitabyna engen, áıgili marafonshy Marat Jylanbaev, 350 balany asyrap alǵan Tuıaq Esqojına, álemniń eń bıik 8 shyńyn baǵyndyrǵan alpınıst Maqsut Jumaev keıipker bolǵan eken. Bıyl meni shaqyrdy. Bul da sporttaǵy jetistiktiń, jeńistiń nátıjesi dep oılaımyn. Barshańyzdy aldyǵa maqsat qoıyp, jeńiske jetý úshin talmaı eńbektenýge shaqyramyn.