Názirbek Óztúrik: Men úshin ákem - uly tulǵa

«Nur Astana» gazetinde jarııalanǵan,  ómirimen kúlli qazaqtyń rýhyn kótergen oǵylannyń balasymen bolǵan suhbatpen oqyrman qaýymdy habardar etkendi jón kórdik.

  - Názirbek, Qazaqstanda turǵyń kele me?

- Áli sheshimge kelip úlgermedim. Bolashaqta baryp qalýym múmkin.

- Qashan úılenbeksiń?

- Qudaı buıyrtsa osy jyly nemese kelesi jyly úılenbekshimin.

- Sen úshin qazaq qandaı uǵym?

- Eń birinshi ózimniń qazaq ekendigimdi maqtanyshpen aıtamyn. Ekinshiden, Qazaqstan - meniń ana Otanym! Bizdiń ata-babalarymyzdyń eli. Saltymyz, dástúrimiz - Qazaqstanmen tyǵyz baılanysty dep aıta alamyn. Sondyqtan, men úshin qazaq bolýdyń oryny erekshe.

- Qazaqtardyń salt-dástúrin bilesiń be?

- Iá, óte jaqsy bilemin dep aıta alamyn. Balalyq shaǵymyz Túrkııada ótti. Ózińiz biletindeı ol jaqta kóptegen týystarymyz bar. Bala týylǵanda, besikke salarynda, shildehanada, úılený toıda, qaıtys bolǵandaǵy joralar - bári-bári kóz aldymyzda ótti. Jastaıymyzdan solardy jadymyzǵa toqyp óstik.
Ákemmen Qazaqstanǵa barǵanym emis-emis esimde. Ol kezde 11-12 jasta edim. Keıinirek birneshe ret baryp, týǵan jerdiń topyraǵyn súıip qaıttym. Alaıda, kóp ýaqyt bolmaǵandyqtan Qazaqstannyń ár túkpirin tolyq bilemin dep aıta almaımyn. Almatyny, Astanany, Qaraǵandyny, Semeıdi bilemin.

- Qazirgi qandaı jumys istep júrsiń?

- Býhgalterlik mamandyǵyn meńgerýdemin. ıAǵnı, jumys isteı júrip tájirıbe jınaqtap jatqan jaıym bar. Buǵan deıin ózge salada qyzmet atqaryp keldim. Mamandyǵymdy aýys-tyryp jatyrmyn.

- Bos ýaqyttaryńdy qalaı ótkizesiń?

- Kóbinese kompıýterde otyramyn. Kitap oqımyn, sportpen aınalysqandy unatamyn, dostarymmen birge qydyramyn, ınternette otyramyn. Keı kezderi tamaq isteımin (kúldi).

- Internettegi qandaı taqyryptar unaıdy?

- Internetten qarastyratyn maǵlumattardyń eń mańyzdysy -Qazaqstan týraly aqparattar. Múmkindigimshe keńinen tanýǵa tyrysamyn. Almatyǵa bardym, qala týraly kitaptardy oqydym. Internetten maǵlumatqa qanyq boldym. Astana meni qatty qyzyqtyrady. Astanaǵa barý - meniń aldaǵy ýaqyttaǵy maqsatym bolmaq.

- Áke jolyn jalǵastyryp júrsiń be?

- Taekvondomen bala kezimde aınalysa bastadym. Ákemmen birge jattyǵatyn edim, maǵan úıretip otyratyn. Qazaqstanǵa kelgennen keıin maǵan qaraılaıtyn ýaqyty bolmady. Sol sebepti jeke daıyndalýyma týra keldi. Ákemniń shákirtteri óte kóp edi. Basym bóligi jetistikterge jetti, keıbiri mektepter ashty. Qazir de ýaqytym bolǵanda jattyǵý jasap turamyn.

- Jetistikke jetken sátteriń boldy ma?

- Belbeý alý, dan alý óte qıyn. Ákemniń mezgilsiz qaıtýy, otbasylyq máselelerge baılanysty taekvondony tolyq meńgerip shyǵa almadym. Áke jolyn jalǵastyra almaýyma osy jaǵdaılar sebep boldy. Taekvondodaǵy belbeýim jasyl tústi.

- "Áke uǵymy sen úshin neni bildiredi?

- Ákeden jastaıymnan aırylǵandyqtan bolar, men úshin áke - uly tulǵa. Ár jyl saıyn Túrkııaǵa ákemizdiń basyna baryp qaıtamyz. Quranymyzdy oqyp, artynan duǵa-tilekterimizdi baǵyshtap otyramyz.

- Áńgimeńe rahmet!