Názir Tórequlov týraly derekti fılminiń tusaýy kesildi
ShYMKENT. QazAqparat - Ońtústik Qazaqstan oblysynda memleket jáne qoǵam qaıratkeri Názir Tórequlovtyń 125 jyldyǵyna arnalǵan shara ótti. Onyń barysynda pýblıtsıst ári qazaqtan shyqqan tuńǵysh dıplomat jaıynda túsirilgen «Názirdiń jaryq juldyzy» atty derekti fılmniń tusaýy kesildi, dep habarlaıdy QazAqparat tilshisi.
Shymkenttegi ázil-syqaq teatrynda ótken «Ultyn súıgen uly tulǵa» atty sharany oblystyq saıası qýǵyn-súrgin qurbandarynyń mýzeıi uıymdastyrdy. Basqosýǵa oblystyq, qalalyq jáne aýdandyq mádenıet mekemeleriniń, joǵary oqý oryndarynyń, jastar isi bólimderiniń basshylary, kitaphana meńgerýshileri men stýdentter qatysty. Taǵlymy mol sharada qajyrly qaıratkerligi urpaqqa ónege bolǵan Názir Tóreqululynyń eren eńbegi sóz boldy. Sondaı-aq qoǵam qaıratkeriniń ǵıbratty ǵumyryndaǵy atqarǵan orasan zor eńbegin kópshilikke nasıhattaý men ony óskeleń urpaqqa tereńirek tanytý, tarıh tulǵasyn dáripteý jaıy aıtyldy.
Jıyn barysynda «Názirtaný negizderi» men «Názir Tórequlov: qoǵamdyq-saıası qyzmeti», sondaı-aq «N.Tórequlov: arhıvtik qujattar men materıaldar jınaǵy» jáne «N.Tórequlovtyń ózbek tilindegi shyǵarmalary men materıaldar jınaǵy» atty kitaptardyń tusaýkeseri ótti. Atalǵan kitaptar qosymsha oqý quraly retinde tarıhshylar men qoǵamtanýshy ǵalymdarǵa jəne joǵary oqý oryndarynyń stýdentteri men kópshilik oqyrman qaýymǵa arnalyp shyǵarylǵan. Atalǵan qundy dúnıeler qala-aýdandardyń ortalyq jáne joǵary oqý oryndarynyń kitaphanalaryna syıǵa tartyldy.
Shara aıasynda «Názirdiń jaryq juldyzy» derekti fılmi kórsetildi. Fılmdi túsirgen OQO saıası qýǵyn-súrgin qurbandary mýzeıi. Prodıýseri - tarıhshy, OQO saıası qýǵyn-súrgin qurbandary mýzeıiniń dırektory Batyrǵazy Serǵazıev, rejısseri - alashtanýshy Tilegen Ahmet, stsenarııin jazǵan - QR Mádenıet qaıratkeri, OQO saıası qýǵyn-súrgin qurbandary mýzeıiniń dırektor orynbasary Gúlmıra Serikbaeva, fılmniń konsýltanty - M.Áýezov atyndaǵy OQMÝ dotsenti, t.ǵ.k.Gaýharbek Tileýqulov.
