Nazym jeńilmedi — bapker IBA men World Boxing álem chempıonattaryn salystyrdy
ASTANA. KAZINFORM — Lıverpýlden Almatyǵa bokstan Qazaqstannyń áıelder ulttyq quramasy oraldy. Olar álem chempıonatynda jalpy komandalyq esepte I orynǵa ıe boldy. Kazinform tilshisi álem chempıonatynyń qorytyndysy týraly úsh sportshy — Alýa Balqybekova, Nazym Kyzaıbaı jáne Eldana Tálipovanyń jeke bapkeri Dolqýnjan Kamekovpen áńgimelesti.
— Lıverpýldegi álem chempıonatyna boksshy qyzdarymyzdyń fınaldyq daıyndyqtary qalaı ótti?
— Chempıonatqa deıin Anglııada 15 kún boıy tórt elmen birge jattyǵý jıyny ótkizdik. Olar — Serbııa, Anglııa, Ispanııa jáne Úndistan. Sol komandalarmen birge daıyndalyp, álem chempıonaty ótken Lıverpýlge bardyq.
— Lıverpýldegi 2025 jylǵy bokstan álem chempıonatyndaǵy shákirtterińizdiń nátıjesine rızasyz ba?
— Jalpy, Qazaqstan quramasynan 10 sportshy qatysyp, altaýy júldeger boldy — 3 altyn, 1 kúmis jáne 2 qola medal jeńip aldy. Meniń shákirtterim — úsh sportshy, barlyǵy medal aldy: Alýa Balqybekova — altyn, Nazym Qyzaıbaı — kúmis, Eldana Tálipova — qola enshiledi. Referı kimniń qolyn kóterse, sol jeńdi. Biz nátıjeni ózgerte almaımyz. Biraq men Nazym fınaldy utty dep senemin. Degenmen tóreshiler basqa sheshim qabyldady.
Bıylǵy maýsymda óz jumysyma kóńilim tolady. Bıyl Serbııanyń Nısh qalasynda IBA álem chempıonatyna qatystyq, onda da meniń úsh shákirtim medal aldy: eki altyn — Alýa men Nazym, bir kúmis — Eldana. Al Lıverpýldegi World Boxing álem chempıonatynda shákirtterim tolyq medal jıyntyǵyn jınady.
— IBA men World Boxing chempıonattarynyń qaısysyn jeńý qıyn boldy dep oılaısyz?
— Ekeýiniń de deńgeıi shamamen birdeı. Sebebi qatysýshylar da, uıymdastyrý da uqsas boldy — Lıverpýl men Nıshte ótkizilgen chempıonattarda deńgeı joǵary boldy.
— 2028 jylǵy Olımpıadadaǵy áıelder boksynyń salmaq dárejeleri týraly aqparat bar ma?
— Ázirge belgisiz. Barlyǵy World Boxing-ke baılanysty bolady. Sol uıym Lıverpýldegi álem chempıonatyn ótkizdi jáne Olımpıadadaǵy boksqa jaýapty bolady. Kútýdemiz.
Eske salsaq, búgin Lıverpýlde ótken bokstan álem chempıonatynan oralǵan Qazaqstannyń áıelder quramasyn Almaty áýejaıynda saltanatty túrde qarsy alǵanyn jazǵan edik.